ننکانہ صاحب، باغی ٹی وی (نامہ نگار احسان اللہ ایاز )ضلعی الیکشن کمشنر کے زیر اہتمام بابا گورونانک یونیورسٹی کے مرکزی ہال میں نوجوانوں میں ووٹ کے حوالے سے آگاہی سیمینار منعقد ہوا۔ سیمینار میں ڈسٹرکٹ الیکشن کمشنر رائے سلطان بھٹی، الیکشن آفیسر وسام علی خان، رجسٹرار بابا گورونانک یونیورسٹی، ڈائریکٹر سٹوڈنٹ افیئرز ڈاکٹر یاسر سعید، سی ای او ڈسٹرکٹ ایجوکیشن اتھارٹی شازیہ بانو، اسسٹنٹ ڈائریکٹر نادرا، اسسٹنٹ ڈائریکٹر سوشل ویلفیئر اینڈ بیت المال، سماجی رہنما ڈاکٹر عابد علی عابد، ڈسٹرکٹ ووٹرز ایجوکیشن کمیٹی کے ممبران اور طلباء و طالبات نے شرکت کی۔
سیمینار سے خطاب کرتے ہوئے مقررین نے ووٹ ڈالنے کے عمل، ووٹر رجسٹریشن کے طریقہ کار اور نوجوان ووٹرز کو جمہوری عمل میں شرکت کی اہمیت سے آگاہ کیا۔ ڈسٹرکٹ الیکشن کمشنر رائے سلطان بھٹی نے نوجوانوں کے کردار کو سراہتے ہوئے انہیں انتخابی حقوق کے ذمہ دارانہ استعمال کی تلقین کی۔ انہوں نے نوجوان ووٹرز کی شرکت سے طرز حکمرانی میں بہتری اور پالیسی سازی میں تبدیلیوں کی مثالیں بھی پیش کیں۔
سیمینار میں نوجوان ووٹرز کو ضروری معلومات فراہم کی گئیں اور معلوماتی لٹریچر بھی تقسیم کیا گیا۔
