ننکانہ صاحب (باغی ٹی وی، نامہ نگار احسان اللہ ایاز )سکھ یاتریوں کی گاڑی پر ڈاکوؤں کی فائرنگ، 40 سالہ رجیش کمار جاں بحق، پولیس کی مبینہ غفلت پر اہل خانہ کا احتجاج
تفصیل کے مطابق بابا گرو نانک کے جنم دن کی تقریبات میں شرکت کے لیے ننکانہ صاحب آنے والے سکھ یاتریوں کی گاڑی کو ڈاکوؤں کی فائرنگ کا سامنا کرنا پڑا۔ واقعہ تھانہ واربرٹن کی حدود میں بھگوڑ کے قریب پیش آیا، جہاں موٹر سائیکل سوار تین نامعلوم ڈاکوؤں نے ایک لاڑکانہ سے تعلق رکھنے والے خاندان کو اسلحہ کے زور پر روکا، نقدی اور موبائل چھین لیے۔
پولیس کے آنے کی اطلاع پر ڈاکوؤں نے فائرنگ شروع کر دی، جس کے نتیجے میں گاڑی کی پچھلی سیٹ پر بیٹھا 40 سالہ یاتری رجیش کمار جاں بحق ہو گیا۔ اہل خانہ نے پولیس کی نااہلی پر سخت احتجاج کیا۔ مقتول کے بہنوئی دولت کمار نے الزام عائد کیا کہ ڈاکو لوٹنے کے بعد فرار ہو رہے تھے، مگر جب موٹر سائیکل پر دو پولیس اہلکار موقع پر پہنچے، تو ڈاکوؤں نے ان پر فائرنگ شروع کر دی۔ اس دوران پولیس اہلکار موقع سے فرار ہو گئے، جبکہ ڈاکوؤں نے اندھا دھند فائرنگ کر کے رجیش کمار کو موت کے گھاٹ اتار دیا۔
اہل خانہ کے مطابق، واقعہ کے بعد بیوی اور دیگر قریبی عزیز شدید صدمے کا شکار ہو گئے اور بے ہوشی کی حالت میں ڈی ایچ کیو ہسپتال ننکانہ صاحب منتقل کر دیے گئے۔ مقتول کے معصوم بچے اپنے والد کو تلاش کر رہے ہیں اور معصومیت سے سوال کرتے ہیں کہ ان کے "پاپا کہاں ہیں؟”۔
پولیس نے نامعلوم ڈاکوؤں کے خلاف مقدمہ درج کر کے ان کی تلاش شروع کر دی ہے اور وعدہ کیا ہے کہ ملزمان کو جلد گرفتار کیا جائے گا۔ تاہم، اہل خانہ اور مقامی افراد نے پولیس کی مبینہ غفلت پر شدید غم و غصہ کا اظہار کرتے ہوئے کہا ہے کہ اگر پولیس اہلکاروں نے مناسب کارروائی کی ہوتی تو شاید یہ سانحہ نہ ہوتا۔ یہ واقعہ سیکیورٹی کے سخت انتظامات اور پولیس کی کارکردگی پر کئی سوالات چھوڑ گیا ہے۔
