نیشنل ویمنز فٹبال کلب چیمپئن شپ 2024 کا ابتدائی مرحلہ ملک کے چار بڑے شہروں اسلام آباد، کراچی، لاہور اور کوئٹہ میں کامیابی کے ساتھ مکمل ہوگیا ہے۔ اس مرحلے میں کئی دلچسپ مقابلے دیکھنے کو ملے جن میں ٹیموں نے اپنی صلاحیتوں کا بھرپور مظاہرہ کیا۔پہلے میچ میں دیا ویمنز فٹبال کلب نے اوورسیز ویمن فٹبال کلب کے خلاف زبردست کھیل کا مظاہرہ کرتے ہوئے 10-0 کی بڑی فتح حاصل کی۔ کوئٹہ میں ہونے والے ایک سنسنی خیز مقابلے میں بلوچستان ویمنز فٹبال کلب نے مقامی ٹیم کوئٹہ ویمنز فٹبال کلب کو 3-2 سے شکست دی۔ اسلام آباد میں کھیلے گئے میچ میں ہائی لینڈرز ویمنز فٹبال کلب نے اسٹرائیکر ویمن فٹبال کلب پر 5-1 سے فتح حاصل کی۔
ابتدائی مرحلے کے بعد آٹھ ٹیمیں فائنل راؤنڈ میں جگہ بنانے میں کامیاب ہوئی ہیں۔ ان میں ٹی ڈبلیو کے، لیگیسی ڈبلیو ایف سی، ہائی لینڈرز ڈبلیو ایف سی، کراچی یونائیٹڈ ڈبلیو ایف سی، کراچی سٹی ڈبلیو ایف سی، دیہ ڈبلیو ایف سی، جافا ڈبلیو ایف سی اور ہزارہ کوئٹہ ڈبلیو ایف سی شامل ہیں۔فائنل راؤنڈ یکم سے 10 اگست تک جناح اسپورٹس کمپلیکس اسلام آباد میں منعقد ہوگا۔ اس راؤنڈ میں شامل تمام ٹیمیں اپنی تیاریوں میں مصروف ہیں اور ٹورنامنٹ جیتنے کے لیے پرعزم ہیں۔پاکستان فٹبال فیڈریشن کے ایک نمائندے نے بتایا کہ "یہ ٹورنامنٹ خواتین فٹبال کو فروغ دینے اور نئی صلاحیتوں کو سامنے لانے کا ایک بہترین موقع ہے۔ ہم امید کرتے ہیں کہ اس سے ملک میں خواتین فٹبال کو مزید مقبولیت ملے گی۔”
Shares:
