این ڈی ایم اے کا بحیرہ عرب میں ممکنہ طوفانی صورتحال کا الرٹ

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے بحیرہ عرب میں پیدا ہونے والی ممکنہ طوفانی صورتحال کے پیش نظر الرٹ جاری کردیا ہے، جس میں ساحلی علاقوں میں رہنے والے افراد اور متعلقہ حکام کو احتیاطی تدابیر اختیار کرنے کی ہدایات دی گئی ہیں۔این ڈی ایم اے کے مطابق، بحیرہ عرب میں موجودہ موسمی سسٹم تیزی سے تبدیل ہو کر ایک بڑے ساحلی طوفان کی شکل اختیار کرسکتا ہے۔ یہ سسٹم اس وقت لکشدیپ وادی انڈیا کے قریب ہے اور اس بات کا امکان ہے کہ یہ طوفان بھارت کے شمال مغربی علاقوں کی طرف بڑھ سکتا ہے۔ اگر یہ طوفان مزید شدت اختیار کرتا ہے تو یہ پاکستان کے ساحلی علاقوں کو بھی متاثر کر سکتا ہے۔
این ڈی ایم اے کے الرٹ میں کہا گیا ہے کہ یہ موسمی سسٹم اکتوبر کے تیسرے ہفتے میں پاکستان کی ساحلی پٹی سے ٹکرا سکتا ہے۔ پاکستان کے ساحلی علاقے، بالخصوص کراچی، ٹھٹھہ، بدین، اور بلوچستان کے مکران کے ساحلی علاقوں کو شدید خطرات لاحق ہوسکتے ہیں۔ طوفان کے نتیجے میں تیز ہوائیں، شدید بارشیں اور ساحلی علاقوں میں طغیانی کی صورتحال پیدا ہوسکتی ہے، جس سے رہائشی اور زرعی زمینیں زیر آب آسکتی ہیں۔
این ڈی ایم اے نے ساحلی علاقوں کی ضلعی انتظامیہ، فشریز ڈیپارٹمنٹ، اور دیگر متعلقہ اداروں کو ہدایات جاری کی ہیں کہ وہ فوری طور پر حفاظتی اقدامات کریں اور عوام کو محفوظ مقامات پر منتقل کرنے کے لیے تیاریاں کریں۔ ماہی گیروں کو خصوصی طور پر تنبیہ کی گئی ہے کہ وہ سمندر میں جانے سے گریز کریں اور اپنی کشتیوں کو محفوظ مقامات پر رکھیں۔این ڈی ایم اے نے عوام سے بھی اپیل کی ہے کہ وہ الرٹ رہیں اور کسی بھی ہنگامی صورتحال میں فوری طور پر حکام کے ساتھ رابطہ کریں۔ ساتھ ہی انہیں تاکید کی گئی ہے کہ وہ افواہوں پر کان نہ دھریں اور صرف مستند ذرائع سے معلومات حاصل کریں۔پاکستان کی ساحلی پٹیوں پر طوفانی حالات کے پیش نظر این ڈی ایم اے نے پہلے سے ہنگامی صورتحال سے نمٹنے کے لیے تیاریاں شروع کردی ہیں اور عوام کو بھی فوری طور پر ضروری احتیاطی تدابیر اختیار کرنے کی ہدایت دی ہے۔