نگران وزیر اعلی پنجاب پی سی بی کے چئیر مین بن گئے

محسن نقوی سپیڈ پی سی بی پہنچ گئی،چیئرمین پی سی بی مینجمنٹ کمیٹی ذکا اشرف کی جگہ محسن نقوی کو پاکستان کرکٹ بورڈ (پی سی بی) میں نامزد کرنے کا فیصلہ کرلیا گیا۔
محسن نقوی اس وقت پنجاب کے نگران وزیر اعلیٰ بھی ہیں۔واضح رہے کہ 19 جنوری کو پاکستان کرکٹ بورڈ (پی سی بی) چیئرمین مینجمنٹ کمیٹی کے سربراہ ذکا اشرف نے عہدے سے استعفیٰ دے دیا تھا۔ پی سی بی منیجمنٹ کمیٹی کے سربراہ ذکاء اشرف کا استعفی نگراں وزراعظم اور پی سی بی کے پیٹرن انوار الحق کاکٹر نے منظور کر لیا، جس کے بعد فیصلہ کیا گیا ہے کہ ذکاء اشرف کی جگہ محسن نقوی کو پی سی بی میں نامزد کیا جائے گا۔ذرائع کے مطابق محسن نقوی کو پی سی بی بورڈ آف گورنرزمیں پیٹرن کا نماٸندہ مقرر کرتے ہوے پی سی بی کے چیٸرمین کے لیے نامزد کیا جائے گا۔وزارت بین الصوبائی رابطہ محسن نقوی کی نامزدگی کا نوٹیفکیشن جاری کرے گی۔
واضح رہے کہ وزیراعظم کی جانب سے براہ راست چیئرمین پی سی بی کو منتخب نہیں کیا جاسکتا۔ نمائندے کی تقرری کے بعد پی سی بی کا گورننگ بورڈ ووٹنگ کے ذریعے چیئرمین کا انتخاب کرتا ہے۔ پی سی بی کا گورننگ بورڈ 10ارکان پر مشتمل ہے اور امکان ہے کہ محسن نقوی، ذکاء اشرف کی خالی کردہ جگہ پر کام کریں گے۔
قواعد کے مطابق موجودہ وزیراعظم پی سی بی کے سرپرست ہیں جو پہلے ہی محسن نقوی کی نامزدگی کی منظوری دے چکے ہیں۔بورڈ کا رکن بننے کے بعد نقوی پی سی بی کے چیئرمین کے لیے الیکشن لڑ سکیں گے۔تاہم یہ واضح نہیں ہے کہ نقوی کب پی سی بی کا حصہ بنیں گے کیونکہ وہ اب بھی پنجاب کے وزیراعلیٰ ہیں۔
واضح رہے کہ 2013 مین پنجاب کے نگراں وزیراعلیٰ کی حیثیت سے خدمات انجام دینے والے نجم سیٹھی کو پی سی بی کا چیئرمین بنایا گیا تھا۔