ملتان:نشترمیڈیکل یونیورسٹی ملتان کی چھتوں پر لاشوں کی بیحرمتی کا معاملہ شدت اختیار کرگیا ہے اور اس حوالے سے تحقیقات کے لیے تشکیل دی گئی کمیٹی کی رپورٹ بھی سامنے آگئی ہے، میں نشتر اسپتال کی چھت پر لاشوں کی موجودگی کے معاملے کی انکوائری رپورٹ مکمل کر کے ایڈیشنل چیف سیکریٹری کو ارسال کر دی گئی۔نشتر اسپتال میں ایڈیشنل چیف سیکریٹری کی قائم کردہ تحقیقاتی کمیٹی کا اجلاس ہوا۔
انکوائری رپورٹ میں کہا گیا ہےکہ لاشیں وصول کرنے اور چھت پر رکھنے والے اسپتال ملازمین کے خلاف محکمانہ کارروائی کی جائےگی کیونکہ انہیں لاشیں کمرے میں رکھنی چاہیے تھیں۔
رپورٹ میں کہا گیا کہ پولیس جس دن لاوارث لاش لائےگی اس کے 28 دن کے بعد لاش لے جانےکی ذمہ دار ہوگی، پولیس یونین کونسل کے سیکرٹری کے ساتھ مل کر لاش کی تدفین کرے گی، اسپتال انتظامیہ اور پولیس لاشوں کی تدفین کے لیے آپس میں رابطے میں رہیں گے۔
واضح رہے کہ چند روز قبل نشتر اسپتال کی چھت سے لاشیں اور باقیات ملنے کی ویڈیو وائرل ہوئی تھی۔وزیرِ اعلیٰ پنجاب چوہدری پرویز الہٰی اور ایڈیشنل چیف سیکریٹری نے اس معاملے پر تحقیقاتی کمیٹی قائم کی تھی۔
ایڈیشنل چیف سیکریٹری ریٹائرڈ کیپٹن ثاقب ظفر نے اسپیشلائزڈ ہیلتھ کیئر سیکریٹری مزمل بشیر کو واقعے کا جائزہ لینے کی ہدایت بھی کی اور معاملے کی تحقیقات کے لیے چھ رکنی ٹیم تشکیل دی تھی جس کی رپورٹ کے بعد اب ملازمین کے خلاف کارروائی کا فیصلہ کیا گیا ہے
