نوجوانوں کو کس کے پیغام کو سمجھنے کی ضرورت ہے؟ نیول چیف کا کیڈٹس سے خطاب
باغی ٹی وی کی رپورٹ کے مطابق یوم والدین کی تقریب کیڈٹ کالج حسن ابدال میں منعقد ہوئی جس میں چیف آف دی نیول اسٹاف ایڈمرل ظفر محمود عباسی نے بطور مہمان خصوصی شرکت کی۔
تقریب کے شرکاء سے خطاب کے دوران چیف آف دی نیول اسٹاف جو کہ خود اس ادارے سے فارغ التحصیل بھی ہیں نے کیڈٹس کو معیاری تعلیم کی فراہمی اور کردار سازی میں کیڈٹ کالج حسن ابدال کی خدمات کو سراہا۔ انہوں نے کیڈٹ کالج حسن ابدال کو ملک کے ممتاز اداروں میں سے ایک بنانے میں اساتذہ کے اہم کردار کی تعریف کی۔ کیڈٹس کو مخاطب کرتے ہوئے ایڈمرل نے انہیں اللہ تعالیٰ پر یقین کامل، ا نتھک محنت اور اعلیٰ اخلاق اپنانے کی تلقین کی ۔ علاوہ ازیں، انہوں نے نوجوان کیڈٹس کو تاکید کرتے ہوئے کہا کہ وہ علامہ اقبال کے فلسفہ جو قرآنی تعلیمات پر مبنی ہے پرمضبوطی سے قائم رہیں۔ اس موقع پر مہمان خصوصی نے خطاب کرتے ہوئے اس بات پر بھی زور دیا کہ ہمارے نوجوانوں کو اقبال کے پیغام کو سمجھنے اور اپنی زندگی میں شامل کرنے کی کوشش کرنی ہوگی۔
قبل ازیں پرنسپل بریگیڈیئر (ر) ناصر سعید خٹک نے کالج کی سالانہ رپورٹ پیش کی اور تعلیم، کھیلوں اور ہم نصابی سرگرمیوں میں کیڈٹس کی اہم کار کردگی کو اجاگر کیا۔
بعدازاں چیف آف دی نیول اسٹاف نے نمایاں کارکردگی کا مظاہرہ کرنے والے کیڈٹس میں انعامات تقسیم کیے۔ عمر ونگ نے چیمپیئن ٹرافی اپنے نام کی، جبکہ اقبال ونگ نے دوسرا نمبر حاصل کیا۔ تقریب کے دوران کیڈٹس نے مارچ پاسٹ، جمناسٹکس اور گھڑ سواری کے شاندار مظاہرے پیش کئے۔
تقریب میں سول وفوجی معززین، علاقہ کی مشہور شخصیات ، والدین اور مہمانوں کی ایک بڑی تعداد نے شرکت کی۔
