شمالی وزیرستان کے علاقے میر علی میں شہید ہونے والے افسران اور جوانوں کی نمازِ جنازہ ادا

لیفٹیننٹ کرنل سید کاشف اور کیپٹن محمد احمد کی نمازِ جنازہ چکلالہ گیریژن میں ادا کی گئی جس میں صدر آصف علی زرداری، چیف آف آرمی اسٹاف جنرل عاصم منیر، وفاقی وزیرِ داخلہ اور دیگر اعلیٰ حکام نے بھی شرکت کی۔ آئی ایس پی آر کے مطابق چکلالہ گیریژن میں صدر اور آرمی چیف نے شہدا کے لواحقین کو گلے لگا کر تعزیت کی۔بعدازاں شہدا کی میتیں ان کے آبائی علاقوں میں پہنچا دی گئیں جہاں انہیں پورے فوجی اعزاز کے ساتھ سپردِ خاک کیا جائے گا۔ اس موقع پر صدر مملکت نے اپنے بیان میں کہا کہ پاک فوج نے ایمان، اتحاد اور نظم و ضبط کے نظریات کو مسلسل برقرار رکھا ہے، پاک فوج نے ہمیشہ دہشتگردی کے خلاف جنگ میں پیشہ ورانہ مہارت اور وفاداری کے اعلیٰ معیار قائم کیے ہیں۔ صدر آصف علی زرداری کا کہنا تھا بہادر بیٹوں نے مادر وطن کے دفاع کیلئے قربانی دینے سے کبھی دریغ نہیں کیا، پوری قوم ہماری مسلح افواج کے ساتھ کھڑی ہے۔ عظیم قربانی بہادر بیٹوں کے غیر متزلزل عزم کی مثال ہے جو ان کی شہادت کی صورت میں موجود ہے۔واضح رہے کہ گزشتہ روز شمالی وزیرستان کے علاقے میر علی میں 6 دہشت گردوں نے بارود سے بھری گاڑی سیکیورٹی فورسز کی چیک پوسٹ سے ٹکرائی تھی اور کئی خودکش حملے کیے تھے۔اس حملے کے نتیجے میں عمارت کا ایک حصہ گر جانے سے پاک فوج کے پانچ جوان شہید ہوگئے تھے جبکہ کلیئرنس آپریشن کے دوران 6 دہشت گرد ہلاک کر دیے گئے تھے، بہادری سے مقابلہ کرتے ہوئے لیفٹیننٹ کرنل سید کاشف علی اور کیپٹن محمد احمد بدر نے جامِ شہادت نوش کیا تھا۔