نوشکی کے علاقے کلی محمد حسنی میں نامعلوم موٹر سائیکل سواروں کی فائرنگ سے پولیو ٹیم کی حفاظت پر تعینات پولیس اہلکار چل بسا۔ ایس ایچ او نوشکی کے مطابق حملہ آور پولیس اہلکار کی کلاشنکوف اور موٹر سائیکل لے کر فرار ہو گئے۔ علاقے میں سرچ آپریشن جاری ہے۔
اسپیکر قومی اسمبلی سردار ایاز صادق نے اس حملے کی پرزور الفاظ میں مذمت کی ہے۔ انہوں نے شہید پولیس اہلکار عبدالوحید کو خراج عقیدت پیش کرتے ہوئے کہا کہ ان کی قربانی کو ہمیشہ یاد رکھا جائے گا۔ اسپیکر قومی اسمبلی نے شہید کے لواحقین سے دلی ہمدردی اور تعزیت کا اظہار کیا اور ان کے صبر جمیل کی دعا کی۔
سردار ایاز صادق نے کہا کہ بچوں کے محفوظ مستقبل کے لیے مامور انسداد پولیو ٹیم پر حملہ ناقابل برداشت ہے۔ ایسے شر پسند عناصر جو بچوں کی صحت اور زندگی کو خطرے میں ڈالتے ہیں، ان سے سختی سے نمٹا جائے گا۔ انہوں نے کہا کہ ہم شہید کے اہلخانہ کے غم میں برابر کے شریک ہیں اور ان کے دکھ کو محسوس کرتے ہیں۔
وزیر اعظم شہباز شریف نے بھی نوشکی میں انسداد پولیو ٹیم پر حملے کی شدید مذمت کرتے ہوئے شہید پولیس اہلکار عبدالوحید کے اہل خانہ سے گہری ہمدردی اور تعزیت کا اظہار کیا۔ وزیر اعظم نے دعا کی کہ اللہ تعالیٰ شہید کو جنت الفردوس میں اعلیٰ مقام عطا کرے اور اہل خانہ کو صبر و استقامت دے۔وزیر اعظم نے کہا کہ پولیو مہم کے خلاف حملے کسی صورت قبول نہیں کیے جائیں گے اور اس سلسلے میں کارروائی سختی سے کی جائے گی تاکہ بچوں کا مستقبل محفوظ بنایا جا سکے۔ انہوں نے کہا کہ یہ حملے ملک کے ترقیاتی اور صحت کے نظام کو نقصان پہنچانے کی کوشش ہیں، جنہیں کسی صورت برداشت نہیں کیا جائے گا۔
صوبائی وزیر منصوبہ بندی و ترقیات بلوچستان میر ظہور احمد بلیدی نے نوشکی میں پولیو سیکورٹی ٹیم پر فائرنگ کی مذمت کی ہے اور کہا ہے کہ نوشکی میں پولیو ٹیم کی سیکیورٹی پر مامور پولیس اہلکار وحید احمد ولد محمد ہاشم کی شہادت ایک نہایت افسوسناک اور قابل مذمت واقعہ ہے۔
