اوچ شریف :سیلاب زدگان کی کشتی درخت سے ٹکرا کر الٹ گئی، 16 افراد کو بچالیا گیا

اوچ شریف باغی ٹی وی (نامہ نگار حبیب خان) سیلاب زدگان کو لانے والی کشتی درخت سے ٹکرا کر الٹنے سے 16 افراد ڈوب گئے، مقامی لوگوں اور ریسکیو کی بروقت کارروائی سے تمام افراد کو بحفاظت نکال لیا گیا،6 موٹر سائیکل و دیگر سامان بھی نکال لیا گیا، قیمتی سامان سیلابی پانی میں بہہ گیا،
تفصیلات کے مطابق تحصیل احمد پور شرقیہ کے سیلاب زدہ علاقے موضع ودھنور میں گزشتہ شب بستی کلر والی سے سیلاب زدگان کو لانے والی کشتی اندھیرے کے باعث درخت سے ٹکرا کر الٹ گئی جس کے نتیجے میں کشتی میں سوار 16 مرد و خواتین سیلابی پانی میں ڈوبنے لگے جن کا شور سن کر قریبی آبادی کے لوگوں نے ہمت کا مظاہرہ کرتے ہوئے لوگوں کو نکالنے کی تگ دو کرنے لگے جبکہ فوری اطلاع پر ریسکیو ٹیم بھی پہنچ گئی اور کشتی میں سوار تمام 16 افراد کو ڈوبنے سے بچاتے ہوئے بحفاظت زندہ نکال لیا،

ریسکیو آپریشن اندھیرا ہونے کی وجہ سے رات کو ملتوی کر دیا گیا اور صبح کشتی سے ڈوبنے والا سامان بھی نکال لیا گیا جن میں 6 موٹر سائیکل اور دیگر سامان نکال کر لوگوں کے حوالے کر دیا گیا، سیلاب متاثرین کے مطابق ان کا بہت سارا قیمتی سامان سیلابی ریلے میں بہہ گیا ہے، اہلیان علاقہ نے ریسکیو 1122 کی کارکردگی کو سراہا