اوچ شریف ،باغی ٹی وی (نامہ نگار حبیب خان) گورنمنٹ سیدہ طلعت زہرہ گیلانی ایسوسی ایٹ کالج برائے خواتین اوچ شریف میں پنجاب پروفیسرز اینڈ لیکچررز ایسوسی ایشن کی مقامی قیادت کا اجلاس، مرکزی رہنماؤں کی غیر قانونی گرفتاری اور اساتذہ پر پولیس تشدد کی مذمت، اساتذہ کا احتجاج ، مطالبات تسلیم کیے جانے تک تدریسی و دفتری امور کا بائیکاٹ-
تفصیلات کے مطابق گورنمنٹ سیدہ طلعت زہرہ گیلانی ایسوسی ایٹ کالج برائے خواتین اوچ شریف میں پنجاب پروفیسرز اینڈ لیکچررز ایسوسی ایشن کی مقامی قیادت کا ہنگامی اجلاس پرنسپل مسز انیسہ بتول کے زیر صدارت منعقد ہوا، اجلاس میں وائس پرنسپل مسز عشرت پروین سمیت کالج کے تدریسی سٹاف نے شرکت کی، اس موقع پر اجلاس میں ملازمین کے بنیادی مطالبات لیو انکیشمنٹ/ ایل پی آر کی رننگ بیسک پے پر ادائیگی، پنشن رولز میں ملازم کش ترامیم اور گریجویٹی میں کمی کے خاتمے جیسے مطالبات کی منظوری کے لیے پرامن احتجاج کرنے پر پنجاب پروفیسرز اینڈ لیکچررز ایسوسی ایشن (پپلا) اور آل گورنمنٹ ایمپلائز گرینڈ الائنس (اگیگا) کے مرکزی رہنماؤں کی گرفتاری اور اساتذہ پر پولیس تشدد کی بھرپور مذمت کرتے ہوئے ان کی فوری رہائی کا مطالبہ کیا گیا اور مطالبات کی منظوری تک کالج میں تدریسی امور کے بائیکاٹ کا فیصلہ کیا گیا،
اجلاس سے خطاب کرتے ہوئے مسز انیسہ بتول نے کہا کہ ریٹائرمنٹ پر ملنے والے ایک اہم بینیفٹ یعنی لیو انکیشمنٹ کے قوانین میں تبدیلیوں کے خاتمے کے مطالبے کو حکومت پنجاب نے جولائی میں تسلیم کر لیا تھا لیکن بعد میں حسب روایت وہ اپنے وعدے سے مکر گئی تھی، انہوں نے کہا کہ یہ اطلاعات بھی آرہی ہیں کہ پنجاب حکومت کی طرف سے تنخواہوں میں سالانہ انکریمنٹ کا بھی خاتمہ کیا جا رہا ہے
اور پنجاب میں ہزاروں سرکاری سکولوں کی نجکاری بھی کی جا رہی ہے، ان ملازم دشمن اقدامات کا فوری خاتمہ پپلا اور اگیگا کے بنیادی مطالبات میں شامل ہے، اجلاس کے اختتام پر اساتذہ نے مسز انیسہ بتول کی قیادت میں پلے کارڈ اٹھا کر احتجاج کیا۔
