اوچ شریف :سرکاری سکولوں کی عمارتیں خستہ حال،طلبہ موت کے سایہ تلے پڑھنے پر مجبور

اوچ شریف باغی ٹی وی (نامہ نگار حبیب خان)اوچ شریف شہر وگردونواح علاقوں میں درجنوں سے زائد سکول خستہ حالی کا شکار ، طلبہ موت کے سایہ تلے پڑھنے پر مجبور
تفصیلات کے مطابق جنوبی پنجاب کے ضلع بہاولپور کے شہر اوچ شریف کے گردونواح علاقوں میں درجنوں سے زائد ایسے تعلیمی ادارے ہیں جن کی عمارتیں کئی کی سال پرانی، انتہائی خستہ حال اور عمارتیں بھوت بنگلہ کی شکل اختیار کیے ہوئے ہیں۔ جبکہ درجنوں سے زائد ایسے سکولز ہیں جن کی عمارتوں کے اکثریتی پورشن خستہ حال اور بارش آنے پر چھتیں ٹپکتی ہیں۔ بچوں کو سکولوں میں جاتے ہوئے خوف تو آتا ہے ، لیکن مجبوراً ان سکولوں میں تعلیم حاصل کر رہے ہیں اور ان سکولوں کی عمارتوں کو خطرناک قرار دیے جانے کے باوجود لیکن کئی سال گزر جانے کے باوجود ان سکولوں کی حالت کو بہتر نہ بنایا جا سکا۔

میڈیا نمائندوں کے مختلف سرکاری سکولوں کا سروئے کرنے پر حالت ابتر، گورنمنٹ پرائمری سکول عریبک بوائز سکول ٹھٹہ وارن۔گورنمنٹ پرائمری سکول امیر آباد ، گورنمنٹ گرلز پرائمری اسکول قادر آباد گورنمنٹ پرائمری سکول قادر آباد، جی پی ایس موہانہ،گورنمنٹ بوائز پرائمری سکول بستی عبدالرحمن سمیت درجن بھر اسکول انتہائی خطرناک مخدوش حالت زار کا شکار کسی بھی وقت ناگہانی حادثے سے افسوسناک انسانی سانحہ کا باعث بن سکتے ہیں ، گزشتہ مون سون سیزن میں ان خطرناک مخدوش عمارتوں کی حالت زار مزید ابتر کردی ہے جو کسی بھی وقت انسانی جانوں معصوم بچوں کی قیمتی زندگی کو نقصان پہنچنے کا باعث بن سکتی ہے سکول کی عمارات 100 سال کے قریب اور عمارات انتہائی خستہ حال ہونے پر انتظامیہ نے اسے خطرناک عمارات تو قرار دے رکھا ہے

اس کے باوجود ان سکولوں میں بچے خوف کے باوجود زیر تعلیم ہیں سکولوں کے طلبہ اور ان کے والدین نے انتظامیہ سمیت وزیر اعلیٰ پنجاب سے اپیل کرتے ہوے کہا کہ خدارا ان خطرناک قرار دی گئی اسکول کی عمارتوں کو فی الفور ترجیحاتی بنیادوں پر تعمیر کرایا جاے کیونکہ مہنگائی کے اس دور میں پرائیویٹ اسکول کے اخراجات ناقابل برداشت ہیں جبکہ مفت تعلیم کی وجہ سے ہمارے بچے موت کے سائے تلے تعلیم حاصل کرنے پر مجبور ہیں