ڈاکٹرغلام مصطفی بڈانی
اوکاڑہ (نامہ نگار ملک ظفر)پاکستان فیڈرل کونسل آف کالمسٹس کے مرکزی صدر، معروف شاعر، صحافی و کالم نگار احتشام جمیل شامی نے عیدالاضحی کے بابرکت موقع پر اپنے خصوصی پیغام میں کہا ہے کہ یہ عظیم دن حضرت ابراہیمؑ اور حضرت اسماعیلؑ کی بے مثال قربانی کی یاد تازہ کرتا ہے، جو ہمیں اطاعتِ الٰہی، خلوص، ایثار اور محبت کا درس دیتا ہے۔
انہوں نے کہا کہ قربانی محض جانور ذبح کرنے کا نام نہیں بلکہ اصل قربانی اپنے نفس، لالچ، بغض، حسد اور نفرتوں کو مٹا کر خلوص و وفا کا راستہ اپنانا ہے۔ آج کے معاشرے میں ضرورت اس بات کی ہے کہ ہم قربانی کی حقیقی روح کو سمجھیں اور اس پر عمل کر کے ایک پرامن، روادار اور محبت بھرا سماج تشکیل دیں۔
احتشام جمیل شامی نے کہا کہ عیدالاضحی ہمیں موقع دیتی ہے کہ ہم اپنے گردونواح میں موجود محروم طبقے کو بھی اپنی خوشیوں میں شامل کریں۔ یہی عمل اس تہوار کو حقیقی معنوں میں "بڑی عید” بناتا ہے۔
انہوں نے تمام اہل اسلام کو عید کی مبارکباد دیتے ہوئے دعا کی کہ یہ عید ہمارے لیے رحمت، برکت اور قربتِ الٰہی کا ذریعہ بنے۔
