اوکاڑہ (نامہ نگار ملک ظفر)دیپالپور کے نواحی علاقے پیر دی ہٹی کے قریب ایک افسوسناک ٹریفک حادثہ پیش آیا، جس میں ایک نامعلوم گاڑی کی ٹکر سے موٹر سائیکل پر سوار 12 سالہ بچہ علی حمزہ موقع پر ہی جاں بحق ہو گیا، جبکہ اس کا 45 سالہ والد مرتضیٰ شدید زخمی ہو گیا۔
ریسکیو 1122 اوکاڑہ کے ترجمان کے مطابق، اطلاع ملنے پر فوری طور پر دو ایمبولینسز جائے حادثہ کی طرف روانہ کی گئیں۔ ریسکیو ٹیموں نے زخمی مرتضیٰ کو ابتدائی طبی امداد کے بعد ہسپتال منتقل کیا، جبکہ بچے کی لاش کو بھی قانونی کارروائی کے لیے ہسپتال پہنچایا گیا۔
جاں بحق ہونے والے علی حمزہ اور زخمی مرتضیٰ کا تعلق طاہر کلاں، بصیر پور سے بتایا گیا ہے۔ حادثے کے بعد سے گاڑی کا ڈرائیور فرار ہونے میں کامیاب ہو گیا، اور پولیس مزید تفتیش کر رہی ہے۔
