اوکاڑہ (نامہ نگار ملک ظفر)اوکاڑہ کے نواحی علاقے پیر دی ہٹی تھانہ سٹی دیپالپور کی حدود میں مبینہ پولیس مقابلے کے دوران دو بین الصوبائی ڈاکو اپنے ہی ساتھیوں کی فائرنگ سے ہلاک ہو گئے۔ ہلاک ہونے والے ڈاکوؤں کی شناخت سمیر اور علی حسنین کے ناموں سے ہوئی ہے، جو پنجاب اور سندھ میں اقدامِ قتل، ڈکیتی، راہزنی سمیت کم از کم 20 سے زائد سنگین مقدمات میں پولیس کو مطلوب تھے۔
پولیس ترجمان کے مطابق چار مسلح ڈاکوؤں نے 38 ڈی کے علاقے میں ایک شہری سے اسلحے کے زور پر موٹر سائیکل چھین لی۔ واقعے کی اطلاع پر ایس ایچ او فخر حیات اور ان کی ٹیم نے فوری کارروائی کرتے ہوئے ملزمان کا پیچھا کیا۔ پولیس کو دیکھتے ہی ڈاکوؤں نے اندھا دھند فائرنگ شروع کر دی۔ جوابی کارروائی میں دو ڈاکو اپنے ہی ساتھیوں کی فائرنگ کی زد میں آکر موقع پر ہلاک ہو گئے جبکہ دو فرار ہونے میں کامیاب ہو گئے۔
پولیس نے موقع سے چھینی گئی موٹرسائیکل اور اسلحہ برآمد کر لیا ہے۔ ہلاک ملزمان کا ریکارڈ کراچی، لاہور اور پاکپتن کے مختلف تھانوں میں درج ہے۔ فرار ملزمان کی تلاش کے لیے خصوصی ٹیمیں تشکیل دے دی گئی ہیں جبکہ دیپالپور سرکل کی بھاری نفری علاقے میں سرچ آپریشن جاری رکھے ہوئے ہے۔ ہلاک ڈاکوؤں کی لاشیں اسپتال منتقل کر دی گئی ہیں اور مزید تفتیش شروع کر دی گئی ہے۔
