اوکاڑہ (نامہ نگار ملک ظفر) وزیراعلیٰ پنجاب کے ویژن "انصاف کی فراہمی دہلیز تک” کے تحت ضلعی پولیس اوکاڑہ نے عجوہ مارکی، ستگھرہ موڑ، علاقہ تھانہ طیب سعید شہید میں کھلی کچہری کا انعقاد کیا، جس میں مرد و خواتین کی بڑی تعداد نے شرکت کی۔
کھلی کچہری کے دوران شہریوں نے اپنے مسائل براہِ راست ڈسٹرکٹ پولیس آفیسر (ڈی پی او) اوکاڑہ کے سامنے پیش کیے، اور موقع پر ہی متعدد درخواستوں پر قانونی احکامات جاری کیے گئے۔ ڈی پی او نے کہا کہ کھلی کچہریوں کا مقصد عوام کو ان کے گھر کی دہلیز پر انصاف فراہم کرنا اور پولیس و عوام کے درمیان رابطے کو مضبوط کرنا ہے۔
ڈی پی او نے ایس ڈی پی اوز کو ہدایت کی کہ موصول ہونے والی تمام درخواستوں کا فوری اور میرٹ پر حل یقینی بنایا جائے۔ اس موقع پر انچارج کمپلینٹ سیل، انسپکٹر ریحانہ کوکب کو تمام درخواستوں کے مکمل فالو اپ کا حکم بھی جاری کیا گیا۔
پولیس حکام کا کہنا ہے کہ ضلع بھر میں عوام اور پولیس کے درمیان اعتماد کی فضا کو بہتر بنانے کے لیے اس طرح کی کھلی کچہریاں باقاعدگی سے منعقد کی جاتی رہیں گی۔
