اوکاڑہ (نامہ نگار ملک ظفر) بھارتی جارحیت کے خلاف اور پاک فوج سے اظہارِ یکجہتی کے لیے آل پاکستان کلرکس ایسوسی ایشن (ایپکا) کے زیرِ اہتمام ایک بڑی ریلی کا انعقاد کیا گیا، جس میں سینکڑوں کارکنوں نے شرکت کی۔ ریلی ڈسٹرکٹ ایجوکیشن آفس سے شروع ہوئی اور ڈپٹی کمشنر آفس تک پہنچی، جہاں پہلے سے موجود شہریوں نے ریلی کا پرتپاک استقبال کیا اور اس میں شامل ہو گئے۔
ریلی کے شرکاء نے قومی پرچم تھام رکھے تھے اور فضا "پاک فوج زندہ باد” اور "بھارت مردہ باد” کے نعروں سے گونجتی رہی۔ مظاہرین کا کہنا تھا کہ بھارت کی طرف سے جاری جارحیت صرف فوج کے خلاف نہیں بلکہ پوری پاکستانی قوم کے خلاف ہے۔ ان کا کہنا تھا کہ یہ جنگ 25 کروڑ پاکستانیوں کی جنگ ہے، اور پوری قوم اپنی بہادر افواج کے ساتھ شانہ بشانہ کھڑی ہے۔
ریلی کا مقصد نہ صرف دشمن کو واضح پیغام دینا تھا بلکہ اندرون ملک اتحاد، یکجہتی اور قومی شعور کو اجاگر کرنا بھی تھا۔ ایپکا کے رہنماؤں نے کہا کہ دشمن کی ہر سازش کو ناکام بنانے کے لیے قوم متحد ہے، اور عوام فوج کی ہر قربانی کو قدر کی نگاہ سے دیکھتے ہیں۔
