اوکاڑہ,باغی ٹی وی (نامہ نگار ملک ظفر) سول ڈیفنس کے افسران نے کریانہ شاپس پر چینی کے سٹاک کی چیکنگ کرتے ہوئے ڈکلیئریشن میں کمی پر دو دکانداروں کو جرمانہ کر دیا۔
تفصیلات کے مطابق سول ڈیفنس آفیسر وقار اکبر نے فیصل آباد روڈ پر واقع ایک کریانہ شاپ کی انسپیکشن کے دوران گودام میں چینی کی بوریوں کی تعداد کم ظاہر کرنے پر مالک کو 10 ہزار روپے جرمانہ کر دیا، جبکہ نواحی علاقے 49/2 ایل میں چینی کی 90 سے زائد بوریوں کے ڈکلیئریشن ریکارڈ کی عدم فراہمی پر ایک اور دکاندار کو 10 ہزار روپے کا جرمانہ عائد کیا گیا۔
اس موقع پر سول ڈیفنس آفیسر وقار اکبر کا کہنا تھا کہ رمضان المبارک میں چینی کی قیمتوں کو کنٹرول کرنے کیلئے سخت اقدامات کیے جا رہے ہیں، اور جو دکاندار چینی کا سٹاک ظاہر نہیں کریں گے، ان کے خلاف مزید سخت کارروائی عمل میں لائی جائے گی۔ انہوں نے واضح کیا کہ سٹاک ڈکلیئر نہ کرنا بھی ذخیرہ اندوزی کے زمرے میں آتا ہے، لہٰذا کریانہ شاپس اور مارٹس مالکان سٹاک کا مکمل اندراج یقینی بنائیں بصورت دیگر سخت قانونی کارروائی کی جائے گی۔
