اوکاڑہ (نامہ نگارملک ظفر) ڈپٹی کمشنر احمد عثمان جاوید نے کہا ہے کہ وزیراعلیٰ پنجاب کے گڈ گورننس اقدامات ہی عوامی فلاح و بہبود اور علاقائی ترقی کے ضامن ہیں۔ انہوں نے ضلعی انتظامیہ کے افسران کو ہدایت کی کہ وہ حکومت پنجاب کی گائیڈ لائنز کے مطابق ان تمام اقدامات پر عمل درآمد کو یقینی بنانے کے لیے فیلڈ میں موجود رہیں۔ انہوں نے تمام امور کی موثر انداز میں نگرانی کرنے کی بھی تاکید کی۔
ڈپٹی کمشنر احمد عثمان جاوید نے یہ باتیں وزیراعلیٰ پنجاب کے گڈ گورننس اقدامات پر عمل درآمد کے حوالے سے منعقدہ اجلاس کی صدارت کرتے ہوئے کہیں۔ اجلاس میں ایڈیشنل ڈپٹی کمشنر ریونیو محمد ابراہیم ارباب، ایڈیشنل ڈپٹی کمشنر جنرل حافظ محمد عمر طیب، ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، اسسٹنٹ کمشنر اوکاڑہ احسن ممتاز گوندل، اسسٹنٹ کمشنر یو ٹی رب دینو میتلو، ڈپٹی ڈائریکٹر ڈیویلپمنٹ مرغوب حسین ڈوگر، ڈپٹی ڈائریکٹر لوکل گورنمنٹ اور ایس این اے افضال حسین بھی موجود تھے۔
ڈپٹی کمشنر احمد عثمان جاوید نے کہا کہ عوام کو تمام بنیادی سہولیات کی فراہمی، عوامی شکایات کے ازالے اور ان کو درپیش مسائل کے حل کے لیے تمام افسران خدمت کے جذبے کے تحت کام کریں۔ انہوں نے کہا کہ اس سلسلے میں کسی قسم کی لاپرواہی برداشت نہیں کی جائے گی۔
