ڈاکٹرغلام مصطفی بڈانی
اوکاڑہ (باغی ٹی وی،نامہ نگار ملک ظفر )اوکاڑہ کے نواحی گاؤں چک نمبر 52/3R میں کاروباری رنجش پر مویشیوں کے بیوپاری شہزاد حسین پر پانچ ملزمان نے انسانیت سوز سلوک کرتے ہوئے تشدد کیا، سر کے بال اور مونچھیں مونڈھ ڈالیں اور اس کا منہ بھی کالا کر دیا۔ واقعہ نے علاقے میں خوف و ہراس پھیلا دیا، جبکہ پولیس نے فوری کارروائی کرتے ہوئے مقدمہ درج کر کے ملزمان کو گرفتار کر لیا ہے۔
ایف آئی آر کے مطابق متاثرہ شخص شہزاد حسین مویشیوں کا کاروبار کرتا ہے جبکہ ملزمان دانش، لیاقت، اظہر، بگی اور زین بھی اسی کاروبار سے منسلک ہیں اور ان کے شہزاد سے کاروباری رنجش چلی آ رہی تھی۔ گزشتہ شب ان افراد نے شہزاد کو اغوا کر کے ملزم لیاقت کے گھر لے جا کر اسے بہیمانہ تشدد کا نشانہ بنایا، اس کی تذلیل کی، اور اس کی شکل بگاڑ کر ویڈیوز بنانے کی کوشش کی۔
واقعے کی اطلاع ملنے پر ڈسٹرکٹ پولیس آفیسر (ڈی پی او) اوکاڑہ محمد راشد ہدایت نے سخت نوٹس لیتے ہوئے پولیس تھانہ اوکاڑہ کینٹ کو فوری کارروائی کا حکم دیا۔ پولیس نے چابکدستی سے کارروائی کرتے ہوئے تمام نامزد ملزمان کو گرفتار کر لیا اور ان کے خلاف مقدمہ نمبر 225/25 درج کر لیا گیا۔
پولیس ترجمان کے مطابق واقعے کی مکمل تفتیش جاری ہے اور ملزمان کو کیفر کردار تک پہنچایا جائے گا۔ ڈی پی او نے اس عزم کا اظہار کیا ہے کہ کسی کو بھی قانون ہاتھ میں لینے کی اجازت نہیں دی جائے گی، اور شہریوں کے وقار و تحفظ کو ہر حال میں یقینی بنایا جائے گا۔
