اوکاڑہ (نامہ نگار ملک ظفر)اوکاڑہ میں پولیس مقابلے کے دوران بین الاضلاعی ڈکیت گینگ کا سرغنہ زخمی حالت میں گرفتار کرلیا گیا جبکہ اس کے دو ساتھی فرار ہونے میں کامیاب ہوگئے۔
پولیس ترجمان کے مطابق تین مسلح ڈاکو شہری محمد صدیق سے اسلحے کے زور پر موٹرسائیکل چھین کر فرار ہوگئے تھے۔ اطلاع ملتے ہی ایس ایچ او تھانہ منڈی احمد آباد انسپکٹر عدنان رفیق اور ان کی ٹیم نے فوری کارروائی کرتے ہوئے ریسانڈ کیا۔ ٹبی جوگی کے مقام پر ڈاکوؤں نے پولیس کو دیکھتے ہی اندھا دھند فائرنگ شروع کردی۔ پولیس نے بھی حفاظتِ خود اختیاری کے تحت جوابی فائرنگ کی، جس کے نتیجے میں ایک خطرناک ڈاکو زخمی حالت میں گرفتار کرلیا گیا۔
پولیس کے مطابق گرفتار ڈاکو ڈکیتی اور راہزنی جیسے 23 سنگین مقدمات میں ملوث اور بین الاضلاعی ڈکیت گینگ کا سرغنہ نکلا ہے۔ زخمی ڈاکو کو علاج معالجے کے لیے ہسپتال منتقل کردیا گیا جبکہ فرار ہونے والے ڈاکوؤں کی تلاش کے لیے سرچ آپریشن شروع کردیا گیا ہے۔ پولیس کی بھاری نفری علاقے میں موجود ہے۔
