ڈاکٹرغلام مصطفی بڈانی
اوکاڑہ (نامہ نگار ملک ظفر) ایڈیشنل ڈپٹی کمشنر جنرل حافظ محمد عمر طیب کی زیر صدارت محرم الحرام کی مجالس اور جلوسوں کے پرامن اور منظم انعقاد کے لیے ایک اہم جائزہ اجلاس منعقد ہوا۔ اجلاس میں اہل تشیع کے نمائندگان سید کوثر رضوی، صداقت علی بھٹی، سید امیر حسین کے علاوہ محکمہ صحت، واپڈا، میونسپل کمیٹی اور پولیس حکام نے شرکت کی۔
اجلاس میں حکومت پنجاب کی ہدایات کی روشنی میں موسم کی شدت کے پیش نظر جلوسوں اور مجالس کے اوقات میں ممکنہ رد و بدل، مجالس میں ذاکرین کی ویڈیو ریکارڈنگ، مشی واک پر زیرو ٹالرنس پالیسی، اور سیکیورٹی سمیت دیگر اہم انتظامات پر غور کیا گیا۔
ایڈیشنل ڈپٹی کمشنر جنرل حافظ محمد عمر طیب نے واضح کیا کہ حکومت پنجاب کی جانب سے جاری کردہ گائیڈ لائنز پر ہر صورت عمل درآمد کو یقینی بنایا جائے گا۔ انہوں نے مجالس اور جلوسوں کی انتظامیہ کو ہدایت کی کہ وہ ضلعی انتظامیہ، قانون نافذ کرنے والے اداروں اور دیگر متعلقہ محکموں کے ساتھ قریبی روابط قائم رکھیں تاکہ کسی بھی ممکنہ صورتحال سے موثر طور پر نمٹا جا سکے۔
انہوں نے مزید کہا کہ تمام محکمے محرم الحرام کے دوران اپنی ذمہ داریوں کو بخوبی نبھانے کے لیے مکمل تیار رہیں اور امن و امان کے قیام کے لیے بھرپور تعاون کو یقینی بنائیں۔
