اوکاڑہ یونیورسٹی اور نور انٹرنیشنل یونیورسٹی میں تدریسی و تحقیقی اشتراک کا معاہدہ

اوکاڑہ باغی ٹی وی ن(امہ نگار ملک ظفر )اوکاڑہ یونیورسٹی اور نور انٹرنیشنل یونیورسٹی میں تدریسی و تحقیقی اشتراک کا معاہدہ
تفصیلات کے مطابق اوکاڑہ یونیورسٹی اور نور انٹرنیشنل یونیورسٹی کے مابین مفاہمت کی ایک یاداشت پہ دستخط کیے گئے ہیں جس کے تحت دونوں ادارے مینجمنٹ سائنسز، سائیکالوجی، ہیلتھ سائنسز، لائف سائنسز، فوڈ سائنسز، نیوٹریشن، بائیو سائنسز اور بائیو کیمسٹری جیسے شعبہ جات میں تعلیمی و تحقیقی تعاون کے مختلف اقدامات پہ کام کیا جائے گا۔

اس معاہدے کی شرائط اوکاڑہ یونیورسٹی کے وائس چانسلر پروفیسر ڈاکٹر محمد واجد اور نور انٹرنیشنل یونیورسٹی کے ڈین لائف سائنسز پروفیسر ڈاکٹر طاہر ظہور کے مابین ایک آن لائن میٹنگ میں طے پائیں۔ اس موقع پر نور یونیورسٹی کے رجسٹرارحنان مجتبی اور اکاڑہ یونیورسٹی سے ڈاکٹر ثاقب جمیل، ڈاکٹر فیصل نصار، ڈاکٹر سائرہ ستار، ڈاکٹر فرخندہ یاسمین، ڈاکٹر شہزاد اقبال، ڈاکٹر امجد علی اور عائشہ جبار بھی موجود تھے۔

معاہدے میں دونوں جامعات نے مختلف اقدامات پہ اتفاق رائے کیا جن میں اساتذہ اور طلباء کا تبادلہ، پیشہ وارانہ تربیت کے سیشن کا انعقاد، تدریسی دورے، کلچرل ایکسچینج پروگرام، صنعتی دورے، کیئریر کونسلنگ اور انٹرنشپ شامل ہیں۔

اس کے علاوہ باہمی اشتراک سے ورکشاپس، سیمینارز اور کانفرنسز بھی منعقد کروائی جائیں گی۔ نور انٹرنیشنل یونیورسٹی اکاڑہ یونیورسٹی کے اساتذہ اور طلباء کو ریسرچ پراجیکٹس میں بھی معاونت فراہم کرے گی۔ اوکاڑہ یونیورسٹی کے لائف سائنسز اور ہیلتھ سائنسز کے طلباء کےلیے نور یونیورسٹی کی لیبارٹریوں اور ان سے منسلک ہسپتالوں کے دوروں کا بھی اہتمام کیا جائے گا۔

نور انٹرنیشنل یونیورسٹی کے رجسٹرار کا کہنا تھا کہ اوکاڑہ یونیورسٹی کے شعبہ مینجمنٹ سائنسز کے اشتراک سےدور حاضر کے تقاضوں کو پورا کرنے والی نئے ڈگری پروگرامز بھی متعارف کروائے جائیں گے۔

معاہدے کے حوالے سے بات چیت کرتے ہوئے پروفیسر واجد کا کہنا تھا کہ اوکاڑہ یونیورسٹی اپنی تدریسی و تحقیقی کوالٹی کو بہتر بنانے اور طلباء کو جدید تعلیم اور سہولیات کی فراہمی کےلیے نور انٹرنیشنل یونیورسٹی کے وسائل، تجربات اور سہولیات سے بھرپور فائدہ اٹھا سکتی ہے۔