ڈاکٹرغلام مصطفی بڈانی
دیپالپور(باغی ٹی وی ،نامہ نگارامتیازشاہین چوہدری) پاکستان مرکزی مسلم لیگ کے زیر اہتمام یومِ تکبیر پر عظیم الشان جلسہ و ریلی، پاک فوج سے اظہارِ یکجہتی اور ایٹمی پاکستان کو خراجِ تحسین
تفصیل کے مطابق یومِ تکبیر کے موقع پر پاکستان مرکزی مسلم لیگ ضلع اوکاڑہ کے زیر اہتمام گول چوک میں ایک عظیم الشان جلسہ اور ریلی کا انعقاد کیا گیا، جس میں شہریوں، پارٹی کارکنان اور رہنماؤں کی بڑی تعداد نے بھرپور شرکت کی۔ شرکاء نے پرجوش نعروں اور قومی جذبے کے ساتھ پاک فوج، پاکستان کی خودمختاری اور ایٹمی طاقت کے حق میں آواز بلند کی۔
جنرل سیکرٹری انجینیئر محمد عمران، عبدالغفار المدنی، احسان الٰہی وٹو اور ابوعمار صدیق نے خطاب کرتے ہوئے کہا کہ یومِ تکبیر صرف ایک دن نہیں بلکہ پاکستان کی غیرت، اسلامی شناخت اور نظریاتی پختگی کی علامت ہے۔ انہوں نے کہا کہ ایٹمی تجربات نہ صرف دفاعی کامیابی تھے بلکہ ایک نظریاتی پیغام بھی تھے کہ پاکستان کسی دباؤ کو خاطر میں نہیں لاتا۔
مقررین نے پاک فوج کو "ہمارے خون کا حصہ” قرار دیتے ہوئے کہا کہ افواج پاکستان کی قربانیاں، خصوصاً شہداء کا خون، قوم میں حب الوطنی اور استقامت کا وہ جذبہ پیدا کرتا ہے جو تاریخ میں کم ہی دیکھنے کو ملتا ہے۔
جلسے میں چوہدری معظم (سرپرست ضلع اوکاڑہ) اور میاں شہزاد ڈولہ (صدر تعلقات عامہ) نے بھی شرکت کی اور کہا کہ اب وقت آ گیا ہے کہ پاکستان دوبارہ نظریاتی اور سیاسی خودمختاری کی طرف لوٹے۔ انہوں نے نوجوان نسل کو یاد دلایا کہ یومِ تکبیر صرف ماضی کی کامیابی نہیں بلکہ مستقبل کی ذمہ داری بھی ہے۔
جلسے کے اختتام پر کشمیر اور فلسطین سے اظہارِ یکجہتی کرتے ہوئے نعرے لگائے گئے اور ملکی سلامتی، استحکام اور امت مسلمہ کی فلاح و فتح کے لیے دعا کی گئی۔
