ڈاکٹرغلام مصطفی بڈانی
اوکاڑہ (نامہ نگار ملک ظفر)تھانہ گوگیرہ کی حدود میں پولیس اور ڈاکوؤں کے درمیان ہونے والے مقابلے میں 4 خطرناک ڈاکو گرفتار کر لیے گئے جن میں سے 2 زخمی حالت میں پکڑے گئے جبکہ 3 ڈاکو فرار ہو گئے۔ پولیس نے مقابلے کے بعد علاقے میں سرچ آپریشن کیا جس کے دوران مزید 2 ڈاکو گرفتار کر لیے گئے۔
پولیس ترجمان کے مطابق ڈی پی او اوکاڑہ راشد ہدایت کی ہدایت پر ڈاکو ناکہ جات کے خاتمے کے لیے سپیشل ٹیمیں تشکیل دی گئی تھیں اور گشت کے نظام کو مزید مؤثر بنایا گیا۔ تھانہ گوگیرہ کے علاقہ 42 جی ڈی میں 7 ڈاکو ناکہ لگانے کی کوشش کر رہے تھے، جس پر شہری دلشاد نے پکار 15 پر پولیس کو اطلاع دی۔
ایس ایچ او گوگیرہ نے فوری طور پر اپنی ٹیم کے ہمراہ کارروائی کی، تاہم ڈاکوؤں نے پولیس پارٹی کو دیکھتے ہی اندھا دھند فائرنگ شروع کر دی۔ پولیس نے جوابی فائرنگ کی جس کے نتیجے میں دو ڈاکو اپنے ہی ساتھیوں کی فائرنگ سے زخمی ہو گئے اور گرفتار کر لیے گئے۔
بعد ازاں سرچ آپریشن کے دوران مزید دو ڈاکو عثمان اور علی حیدر کو گرفتار کر لیا گیا، جبکہ تین ڈاکو فرار ہونے میں کامیاب ہو گئے۔ گرفتار ڈاکو سنگین نوعیت کے 36 مقدمات میں مطلوب اور اشتہاری نکلے۔
ابتدائی تفتیش میں زخمی ڈاکوؤں کی شناخت رحیم اور تنویر کے ناموں سے ہوئی، جو ڈکیتی اور راہزنی کے 9 مقدمات میں ملوث پائے گئے۔ پولیس کے مطابق ڈاکوؤں کے قبضے سے اسلحہ بھی برآمد کر لیا گیا ہے جبکہ فرار ہونے والے تین ملزمان کی گرفتاری کے لیے خصوصی ٹیمیں تشکیل دے دی گئی ہیں۔ پولیس نے تفتیش شروع کر دی ہے۔
