اوکاڑہ (نامہ نگارملک ظفر) ایڈیشنل ڈپٹی کمشنر ریونیو محمد ابراہیم ارباب کی زیر صدارت ریونیو افسران کا اجلاس منعقد ہوا۔ اجلاس میں تینوں تحصیلوں کے اسسٹنٹ کمشنرز سمیت ریونیو افسران نے شرکت کی۔
ایڈیشنل ڈپٹی کمشنر ریونیو محمد ابراہیم ارباب نے کہا کہ حکومت پنجاب کی ہدایات کے مطابق سرکاری واجبات کی وصولی ریونیو افسران کی بنیادی ذمہ داری ہے۔ انہوں نے افسران کو ہدایت کی کہ وہ دیے گئے اہداف کو حاصل کرنے کے لیے محنت سے کام کریں تاکہ تمام سرکاری واجبات کی وصولی بروقت یقینی بنائی جا سکے۔
انہوں نے مزید کہا کہ آبیانہ، مالیانہ، زرعی انکم ٹیکس سمیت مختلف کھاتہ جات میں سرکاری واجبات کی وصولی جلد از جلد ممکن بنائی جائے۔ انہوں نے افسران کو خبردار کیا کہ اس سلسلے میں کسی قسم کی کوتاہی برداشت نہیں کی جائے گی۔
