لنڈی کوتل(باغی ٹی وی رپورٹ)تورخم بارڈر پر کشیدگی میں اضافہ، پاک افغان فورسز کے درمیان شدید فائرنگ۔ مقامی ذرائع کے مطابق دونوں جانب سے بھاری ہتھیاروں کا استعمال کیا جا رہا ہے، جبکہ فائرنگ سے ایک شخص کے زخمی ہونے کی اطلاع ملی ہے۔
باچا مینہ میں پھنسے مسافروں کو محفوظ مقام پر منتقل کر دیا گیا، تاہم گزشتہ 9 روز سے پاک افغان بارڈر ہر قسم کی آمدورفت کے لیے بند ہے۔
گزشتہ روز پاکستان اور افغان حکام کے درمیان بارڈر کھولنے کے حوالے سے مذاکرات بے نتیجہ رہے۔ ذرائع کے مطابق افغان حکام نے چند مطالبات پیش کیے، جنہیں اسلام آباد اور کابل کے اعلیٰ حکام کے سپرد کر دیا گیا ہے۔
یاد رہے کہ بارڈر کی بندش گزشتہ جمعہ کو اس وقت عمل میں آئی جب افغان حکام نے متنازعہ چیک پوسٹ پر تعمیری کام شروع کیا، جس کے بعد دونوں ممالک کے درمیان تنازعہ شدت اختیار کر گیا۔
