پاک فوج کسی بھی جارحیت کو ناکام بنانےکے لیے پوری طرح تیار ہے،آرمی چیف

راولپنڈی: آرمی چیف جنرل عاصم منیر نےکہا ہےکہ پاک فضائیہ خطے میں طاقت کے توازن کویقینی بنانے میں اہم کردار ادا کر رہی ہے-

باغی ٹی وی: پاک فوج کے شعبہ تعلقات عامہ (آئی ایس پی آر) کے مطابق پاک فضائیہ کے آپریشنل بیس پر انڈکشن اینڈ آپریشنلائزیشن کی تقریب کا انعقاد ہوا جس میں آرمی چیف جنرل عاصم منیر نے بطور مہمان خصوصی شرکت کی، بیس آمد پر ائیرچیف مارشل ظہیر احمد بابر نے آرمی چیف کا استقبال کیا، پاک فضائیہ کے چاق چوبند دستے نے آرمی چیف کو گارڈ آف آنر پیش کیا، تقریب میں پاک فضائیہ کے نئے ہتھیاروں کے نظام اور دفاعی اثاثوں کی نمائش کی گئی۔

اس موقع پر خطاب کرتے ہوئے آرمی چیف کا کہنا تھا کہ پاک فوج کسی بھی جارحیت کو ناکام بنانےکے لیے پوری طرح تیار ہے، پاک فضائیہ خطے میں طاقت کے توازن کویقینی بنانے میں اہم کردار ادا کر رہی ہے آرمی چیف نے اپنے خطاب میں پاک فضائیہ کے نئے شامل کیے گئے ہتھیاروں کا ذکر کیا، آرمی چیف نے جے10سی لڑاکا طیاروں، ائیرموبلٹی پلیٹ فارمز، جدید ریڈارز، بغیر پائلٹ فضائی نظام اور لانگ رینج ویکٹرز کا ذکرکیا، آرمی چیف نے جدیدترین ہتھیاروں کے نظام اور پاک فضائیہ کی آپریشنل تیاریوں کی تعریف بھی کی اور غزہ متاثرین کے لیے امدادی سامان کی نقل وحمل میں پاک فضائیہ کی کوششوں کو سراہا۔