پاکستانی بحریہ کا خلیج عمان میں "ٹیلون گرپ” آپریشن میں حصہ

پاک بحریہ کے جنگی جہاز پی این ایس شمشیر نے خلیج عمان میں علاقائی میری ٹائم سیکیورٹی پٹرول کے دوران آپریشن "ٹیلون گرپ” میں شرکت کی ہے۔ اس آپریشن میں شراکت دار اور دوست ممالک کے ساتھ مشترکہ مشقوں کا انعقاد کیا گیا، جس کا مقصد دوستی اور ہم آہنگی کو فروغ دینا اور خطے میں مشترکہ آپریشنز کی صلاحیت کا مظاہرہ کرنا تھا۔
پاکستانی فوج کے شعبہ تعلقات عامہ (آئی ایس پی آر) کے مطابق، پی این ایس شمشیر نے برطانیہ کی رائل نیوی کے جہاز ایچ ایم ایس لنکاسٹر کے ساتھ مشقیں کیں۔ اس مشق میں دونوں بحری افواج کے درمیان ہم آہنگی اور باہمی تعاون کو بہتر بنانے پر زور دیا گیا۔پاک بحریہ بحر ہند میں قومی اور بین الاقوامی سمندری راستوں کی نگرانی اور انسداد بحری قزاقی اور انسداد منشیات کے لیے کمبائنڈ میری ٹائم فورسز کے تحت سرگرم ہے۔ اس کے ساتھ ساتھ، پاکستانی بحریہ خطے میں سیکیورٹی کی موجودگی برقرار رکھنے کے لیے اپنی کوششیں جاری رکھے ہوئے ہے۔