وزیراعظم شہباز شریف نے کہا ہے کہ پاکستان اور سعودی عرب کے درمیان اقتصادی، دفاعی اور سیکیورٹی سمیت تمام شعبوں میں تاریخی برادرانہ تعلقات کو مزید فروغ دیا جائے گا۔
ریڈیو پاکستان کے مطابق وزیراعظم سے سعودی عرب کی مسلح افواج کے چیف آف جنرل اسٹاف جنرل فیاض بن حمید الرویلی نے اسلام آباد میں ملاقات کی، جس میں آرمی چیف فیلڈ مارشل سید عاصم منیر اور نائب وزیراعظم اسحٰق ڈار بھی موجود تھے۔ملاقات میں شہباز شریف نے خادم حرمین شریفین شاہ سلمان اور ولی عہد محمد بن سلمان کے لیے نیک تمناؤں کا اظہار کرتے ہوئے کہا کہ پاکستان سعودی عرب کی مسلسل حمایت اور یکجہتی کو قدر کی نگاہ سے دیکھتا ہے۔ انہوں نے کہا کہ دونوں ممالک کے تعلقات مشترکہ عقیدے، یکساں اقدار اور باہمی اعتماد پر قائم ہیں۔
وزیراعظم نے گزشتہ دو ماہ میں ریاض کے اپنے کامیاب دوروں کا حوالہ دیتے ہوئے بتایا کہ ان دوروں کے دوران دونوں ممالک کے درمیان اہم اسٹریٹجک دفاعی معاہدوں پر دستخط ہوئے، جو دوطرفہ شراکت داری کو نئی جہت دیں گے۔شہباز شریف نے دہشت گردی اور انتہاپسندی کے خاتمے اور خطے میں امن و استحکام کے فروغ کے لیے پاکستان اور سعودی عرب کے مشترکہ عزم کو بھی اجاگر کیا۔
جنرل فیاض بن حمید الرویلی نے سعودی قیادت کی جانب سے وزیراعظم اور پاکستانی عوام کے لیے تہنیتی پیغام پہنچایا اور کہا کہ سعودی عرب پاکستان کے ساتھ موجودہ دفاعی اور تزویراتی تعاون کو مزید وسعت دینے کا خواہاں ہے۔اس سے قبل جی ایچ کیو میں آرمی چیف فیلڈ مارشل سید عاصم منیر اور سعودی چیف آف جنرل اسٹاف کے درمیان بھی اہم ملاقات ہوئی تھی
