45ویں پاکستان آرمی رائفل ایسوسی ایشن (PARA) سینٹرل میٹ کی اختتامی تقریب جہلم میں منعقد ہوئی۔آرمی مارکسمین شپ یونٹ میں ہونے والی تقریب کے فیلڈ مارشل سید عاصم منیر، نے بطورمہمان خصوصی شرکت کی۔شوٹنگ کے مقابلے یکم اکتوبر تا 10 نومبر 2025 تک جاری رہے جن میں پاکستان آرمی، فضائیہ، بحریہ، سول آرمڈ فورسز کے علاوہ پنجاب، سندھ، خیبرپختونخوا، بلوچستان اور وفاقی رائفل ایسوسی ایشنز سے تعلق رکھنے والے دو ہزار سے زائد نشانہ بازوں نے بھرپور جوش و خروش کے ساتھ حصہ لیا۔
پاک فوج نے تمام چار انٹر سروسز مقابلے جیت کر تیسری انٹر سروسز کامبیٹ شوٹنگ چیمپئن شپ 2025 اپنے نام کی۔پنجاب رجمنٹ نے یونٹ فائرنگ پروفیشنسی میچ گروپ-I میں کامیابی حاصل کی۔سپاہی محمد عرفان (پنجاب رجمنٹ) نے ماسٹر ایٹ آرمز کا اعزاز جیتا۔نائب صوبیدار عمر فاروق (آرمی مارکسمین شپ یونٹ) نے آرمی ہنڈریڈ رائفل میچ ٹرافی حاصل کی۔
تقریب کے دوران فیلڈ مارشل سید عاصم منیر نے شرکاء سے خطاب کرتے ہوئے ان کی شاندار نشانہ بازی کو سراہا اور اس بات پر زور دیا کہ’’نشانہ بازی میں مہارت حاصل کرنا فوجی تربیت کا بنیادی ہدف ہونا چاہیے۔‘‘بعد ازاں آرمی چیف نے ملٹری کالج جہلم کی سو سالہ تقریبات میں بطورِ مہمانِ خصوصی شرکت کی۔اس موقع پر فیلڈ مارشل نے صد سالہ یادگار اور کالج میوزیم کا افتتاح کیا، ادارے کی ایک صدی پر محیط شاندار خدمات کو خراجِ تحسین پیش کیا، اور یادگارِ شہداء پر پھولوں کی چادر چڑھائی
