سہ ملکی ٹی 20 سیریز کے چھٹے میچ میں سری لنکا نے پاکستان کو 6 رنز سے شکست دے کر فائنل میں جگہ بنالی۔ فائنل 29 نومبر کو پاکستان اور سری لنکا کے درمیان کھیلا جائے گا۔
راولپنڈی اسٹیڈیم میں کھیلے گئے میچ میں پاکستان کے کپتان سلمان علی آغا نے ٹاس جیت کر سری لنکا کو بیٹنگ کی دعوت دی۔ لنکن ٹیم نے مقررہ 20 اوورز میں 5 وکٹوں کے نقصان پر 184 رنز بنائے۔ کامل مشارا نے شاندار 76 رنز کی اننگز کھیلی جبکہ کوسال مینڈس نے 40 رنز بنائے۔ پاکستان کی جانب سے ابرار احمد نے 2 وکٹیں حاصل کیں۔
185 رنز کے تعاقب میں پاکستان نے مایوس کن آغاز کیا اور 43 کے اسکور پر 4 کھلاڑی پویلین لوٹ گئے۔ بعد ازاں سلمان علی آغا اور عثمان خان نے 56 رنز کی شراکت سے ٹیم کو سہارا دیا۔ عثمان خان 33 جبکہ محمد نواز 27 رنز بناکر آؤٹ ہوئے۔ آخر میں پاکستان کو آخری اوور میں 10 رنز درکار تھے مگر دشمنتھا چمیرا نے شاندار بولنگ کرتے ہوئے ٹیم کو کامیابی دلائی۔ سلمان علی آغا کی 63 رنز کی اننگز بھی ٹیم کو جیت نہ دلا سکی اور پاکستان 178 رنز تک محدود رہا۔
سری لنکا کی جانب سے دشمنتھا چمیرا نے 4 وکٹیں حاصل کیں جبکہ ایشان مالینگا نے 2 کھلاڑیوں کو آؤٹ کیا۔ اس کامیابی کے ساتھ سری لنکا فائنل میں پہنچ گیا جبکہ زمبابوے ایونٹ سے باہر ہوگیا
