اقوامِ متحدہ میں پاکستان کے مؤثر کردار کا ایک اور اعتراف کیا گیا ہے، پاکستان کو 2026 سے 2028 تک اقوامِ متحدہ کی انسانی حقوق کونسل کا رکن منتخب کر لیا گیا۔
نائب وزیرِ اعظم اور وزیرِ خارجہ اسحاق ڈار نے سماجی رابطے کی ویب سائٹ ایکس پر جاری پیغام میں کہا کہ اللہ تعالیٰ کے فضل و کرم سے پاکستان کو بھاری اکثریت سے اقوامِ متحدہ کی انسانی حقوق کونسل کا رکن منتخب کیا گیا ہے۔اسحاق ڈار نے تمام رکن ممالک کا شکریہ ادا کرتے ہوئے کہا کہ یہ انتخاب عالمی سطح پر انسانی حقوق کے تحفظ اور فروغ میں پاکستان کے فعال کردار کا اعتراف ہے۔
انہوں نے کہا کہ پاکستان عالمی برادری کے ساتھ برداشت، احترام، شمولیت اور تعمیری تعاون کے اصولوں پر عمل پیرا رہتے ہوئے انسانی حقوق کے فروغ، اقلیتوں کے تحفظ اور مساوات کے قیام کے لیے اپنا کردار جاری رکھے گا۔
وزیراعظم کاپاکستان کی اقوامِ متحدہ انسانی حقوق کونسل میں شمولیت پر خوشی کا اظہار
وزیراعظم شہباز شریف نے بھی پاکستان کی اقوامِ متحدہ انسانی حقوق کونسل میں شمولیت پر خوشی کا اظہار کرتے ہوئے کہا کہ یہ کامیابی اقوامِ متحدہ میں پاکستان کے مؤثر اور بھرپور کردار کی عکاسی کرتی ہے۔انہوں نے کہا کہ پاکستان دنیا بھر میں انسانی حقوق کے فروغ اور ان کی سربلندی کے لیے کونسل میں اپنا بھرپور کردار ادا کرتا رہے گا۔
