جے یو آئی سربراہ مولانا فضل الرحمان نے کہا ہے کہ 2028 سے تمام محکموں کو سود سے پاک کر دیا جائے گا۔
مولانا فضل الرحمان برطانیہ کے دورے پر ہیں،ویکفیلڈ میں خطاب کرتے ہوئے مولانا فضل الرحمان کا کہنا تھا کہ اسلامی نظام کے نفاذ اور سودی نظام کے خاتمے کے بغیر پاکستان ترقی نہیں کر سکتا، پاکستان کی بقاء اسلامی نظام میں ہے،پاکستان میں انسانی حقوق کے تحفظ اور معشیت کی بہتری کے لیے کردار ادا کرنا ہو گا، 26ویں آئینی ترمیم میں سودی نظام کے خاتمے کو آئین کا حصہ بنایا ہے، آئین ہم سب کا ہے ہمیں اس کا احترام کرنا ہو گا، جمہوریت کی بقاء اور اسلامی نظام کے لیے پاکستان بھر میں تحریک جاری رکھیں گے۔
مولانا فضل الرحمان کا مزید کہنا تھا کہ پاکستان کے امن کے لیے ہمیں متحد ہونا ہو گا، انسداد دہشت گردی ایکٹ میں ترمیم 26 ویں آئینی ترمیم اور جمہوریت کی توہین ہے،کسی کو شک کی بنیاد پر 90 روز تحویل میں رکھنا بنیادی انسانی حقوق کی خلاف ورزی ہے،ہم محفوظ پاکستان کے لیے مضبوط فوج کے قائل ہیں۔
مولانا فضل الرحمان کا لندن کے بعد سعودی عرب کا دورہ بھی متوقع ہے جہاں وہ عمرہ ادا کریں گے، پاکستان کی اہم سیاسی شخصیات اس وقت ملک سے باہر ہیں، صدر مملکت آصف زرداری دبئی میں ہیں ،نواز شریف لندن، امریکہ کے دورے کے بعد جنیوا جا چکے، بلاول زرداری بھی دبئی ہیں،ایسے میں مولانا فضل الرحمان بھی لندن پہنچ گئے، مولانا فضل الرحمان کی 17 نومبر کو واپسی ہوگی.
