پیپلز پارٹی کے بانی چیئرمین اور پاکستان کے سابق وزیرِ اعظم ذوالفقار علی بھٹو کی 46 ویں برسی کے موقع پر پارٹی کے چیئرمین بلاول بھٹو زرداری نے ایک تفصیلی پیغام جاری کیا ہے۔
سماجی رابطے کی ویب سائٹ ایکس پر بلاول بھٹو نے اپنے پیغام میں کہا کہ عدالت نے 45 برس بعد اس بات کا اعتراف کیا کہ شہید ذوالفقار علی بھٹو کو اپنے مقدمے میں انصاف کا حق نہیں دیا گیا اور انہیں منصفانہ ٹرائل کا موقع فراہم نہیں کیا گیا۔ بلاول بھٹو نے اس موقع پر یہ بھی کہا کہ "جیت ہمیشہ سچائی کی ہوتی ہے”۔بلاول بھٹو نے اپنی پوسٹ میں مزید کہا کہ 46 سال قبل، آج کے دن، شہید ذوالفقار علی بھٹو کو رات کے اندھیروں میں ایک جھوٹے اور من گھڑت مقدمے میں پھانسی دی گئی۔ دورانِ ٹرائل انصاف کے تمام تقاضوں کو نظر انداز کیا گیا، اور اس بات کا اعتراف آج 45 سال بعد پاکستان کی سپریم کورٹ نے بھی کیا۔ یہ اس بات کا کھلا ثبوت ہے کہ سچ ہمیشہ جیتتا ہے۔
بلاول بھٹو نے شہید ذوالفقار علی بھٹو کی سیاسی وراثت اور ان کی خدمات کا ذکر کرتے ہوئے کہا کہ ذوالفقار علی بھٹو وہ عہد ساز شخصیت ہیں جنہوں نے سیاست کو محلات سے نکال کر عوام کے درمیان لایا۔ انہوں نے عوام کو طاقت کا اصل سرچشمہ بنایا اور ایک جمہوری پاکستان کے لیے ان کے وژن اور قربانیوں کی کوئی مثال نہیں ملتی۔انہوں نے مزید کہا کہ ذوالفقار علی بھٹو کی قیادت میں پاکستان کے متفقہ آئین کی تشکیل، جوہری پروگرام کا آغاز، اور زرعی و صنعتی اصلاحات جیسے اقدامات ملک کے عظیم تحائف ہیں، جو آج تک قوم کے لیے اہمیت رکھتے ہیں۔بلاول بھٹو نے شہید ذوالفقار علی بھٹو کی 46 ویں برسی کے موقع پر ایک عزم کا اظہار کیا اور کہا کہ ہمیں مل کر پاکستان کو شہید ذوالفقار علی بھٹو اور شہید محترمہ بینظیر بھٹو کے غیر متزلزل عزم سے رہنمائی لیتے ہوئے ایک رول ماڈل مسلم ملک بنانا ہے۔انہوں نے کہا کہ "آئیں، ہم سب مل کر یہ عہد کریں کہ ہم پاکستان کو شہید ذوالفقار علی بھٹو اور شہید بینظیر بھٹو کے خوابوں کی تعبیر بنا کر دنیا کے سامنے ایک جدید، مضبوط اور پرامن مسلم ملک کے طور پر پیش کریں گے”۔
آج پاکستان میں ذوالفقار علی بھٹو کی 46 ویں برسی انتہائی عقیدت اور احترام کے ساتھ منائی جارہی ہے۔ پیپلز پارٹی کی قیادت اور کارکنان شہید ذوالفقار علی بھٹو کی قربانیوں اور سیاسی وراثت کو یاد کر رہے ہیں، جنہوں نے پاکستان کی تاریخ میں اہم کردار ادا کیا۔سابق وزیرِ اعظم ذوالفقار علی بھٹو کی رہنمائی میں پیپلز پارٹی نے ملک کی سیاست کو ایک نئی سمت دی اور عوامی سیاست کی اہمیت کو اجاگر کیا، جو آج بھی پاکستان کے سیاسی منظر نامے پر اثرانداز ہے۔
