بھارتی ہائی کمیشن کے سینئر سفارتکار کی دفتر خارجہ طلبی

بھارتی افواج کی جانب سے ایل او سی پر جنگ بندی انتظامات کی خلاف ورزیاں مسلسل جاری ہیں۔ ترجمان دفتر خارجہ زاہد حفیظ چوہدری کا کہنا ہے کہ پاکستان میں بھارتی ہائی کمیشن کے سینئر سفارتکار کی دفتر خارجہ طلبی کی گئی اور انہیں احتجاجی مراسلہ دیا گیا۔ ترجمان دفتر خارجہ نے کہا کہ بھارت کی جانب سے 19 اگست کو ایل او سی کے سبز کوٹ سیکٹر میں جنگ بندی کی خلاف ورزی کی گئی۔ایل او سی کے سبزکوٹ سیکٹر میں بھارتی افواج نے بلا اشتعال فائرنگ و گولہ باری کی۔ انہوں نے کہا کہ 19 اگست کوسبز کوٹ سیکٹرمیں بھارتی افواج کی فائرنگ سے کھوئی گاؤں کی 70 سالہ جان بی بی بیوہ صدیق شدید زخمی ہوئیں۔ زاہد حفیظ چوہدری نے مزید کہا کہ رواں برس بھارت 2027 مرتبہ جنگ بندی کی خلاف ورزیاں کر چکا ہے۔ ان خلاف ورزیوں میں 16 نہتے شہری شہید اور 166 افراد زخمی ہو چلے ہیں۔ ترجمان دفتر خارجہ کا کہنا ہے کہ بھارتی فورسز لائن آف کنٹرول، ورکنگ باؤنڈری پر مسلسل نہتی شہری آبادی کو نشانہ بنا رہی ہیں، بھارت کا معصوم شہریوں کو جان بوجھ کر نشانہ بنانا قابل مذمت ہے۔ بھارت کی اشتعال انگزیزی خطے میں امن و سلامتی کے لیے خطرہ ہے، ترجمان کے مطابق بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا۔ انہوں نے مطالبہ کیا کہ بھارت اقوام متحدہ سلامتی کونسل کی قراردادوں پر عمل درآمد یقینی بنائےاور2003ء کے فائر بندی انتظام کی پاسداری کرے۔ زاہد حفیظ چوہدری نے کہا کہ نہتے شہریوں کو نشانہ بنانا عالمی قوانین، اقدار کے منافی ہے۔ اقوام متحدہ فوجی مبصر مشن کو ایل او سی پر کام کرنے دیا جائے