کراچی ،باغی ٹی وی(نمائندہ خصوصی ڈاکٹربشیربلوچ) سعودی عرب، قطر، عمان، موریطانیہ، سینیگال اور ملائیشیا سمیت 10 ممالک سے 48 گھنٹوں میں 139 پاکستانی شہریوں کو بے دخل کر دیا گیا، جن میں سے 15 کو کراچی ایئرپورٹ پر حراست میں لے لیا گیا۔
امیگریشن ذرائع کے مطابق سعودی عرب میں بلیک لسٹ، منشیات، چوری، پاسپورٹ کے بغیر سفر اور دیگر الزامات کے تحت 14 افراد کو ڈی پورٹ کیا گیا۔ انسانی سمگلنگ سے بچائے گئے 3 افراد کو موریطانیہ اور 2 کو سینیگال سے بے دخل کیا گیا، جنہیں اے ایچ ٹی سی نے حراست میں لے لیا۔
عمان سے 24 پاکستانی شہریوں کو غیر قانونی طور پر ملک میں داخل ہونے پر ڈی پورٹ کیا گیا، جن میں سے ایک کا نام بلیک لسٹ میں شامل تھا۔ عراق سے 34 پاکستانی زائد المیعاد قیام اور غیر قانونی داخلے پر بے دخل کیے گئے، جن میں سے 2 کو گوجرانوالہ پولیس کے حوالے کر دیا گیا۔
دبئی میں منشیات، چوری، زائد المیعاد قیام اور پاسپورٹ گم ہونے جیسے الزامات پر 31 پاکستانیوں کو ڈی پورٹ کیا گیا، جبکہ ملائیشیا میں غیر قانونی امیگریشن کے باعث 8 افراد کو واپس بھیجا گیا۔
ادیس ابابا اور قطر سے 9 پاکستانی شہریوں کو رہائشی قوانین کی خلاف ورزی، غیر قانونی کام اور دیگر وجوہات پر بے دخل کیا گیا۔ تمام افراد کی تفصیلات متعلقہ حکام کو فراہم کر دی گئی ہیں۔
