پاکستان نے گزشتہ چند برسوں کے دوران اپنی دفاعی صلاحیتوں میں اضافہ اور مؤثر جوہری توازن برقرار رکھنے کے لیے مختلف اقسام کے میزائلوں کے کامیاب تجربات کیے ہیں، جن میں زمین سے زمین تک مار کرنے والے کروز اور درمیانی فاصلے تک مار کرنے والے بیلسٹک میزائل شامل ہیں۔
فتح-4 کروز میزائل
30 ستمبر کو پاک فوج نے مقامی طور پر تیار کردہ فتح-4 کروز میزائل کا کامیاب تجربہ کیا، جس کی رینج 750 کلومیٹر ہے۔آئی ایس پی آر کے مطابق یہ جدید ایویونکس اور نیوی گیشنل نظام سے لیس میزائل دشمن کے دفاعی نظام کو چکمہ دینے اور اہداف کو انتہائی درستگی سے نشانہ بنانے کی صلاحیت رکھتا ہے۔
زمین سے زمین پر مار کرنے والا فتح میزائل
5 مئی کو پاکستان نے فتح سیریز کے زمین سے زمین پر مار کرنے والے گائیڈڈ میزائل کا کامیاب تجربہ کیا، جس کی رینج 120 کلومیٹر ہے۔یہ تجربہ فوجی مشق "ایکس انڈس” کے دوران کیا گیا، جس کا مقصد افواج کی عملی تیاری اور میزائل کے تکنیکی پہلوؤں کی تصدیق تھا۔
ابدالی بیلسٹک میزائل
اسی سال مئی میں پاکستان نے سطح سے سطح پر مار کرنے والے ابدالی بیلسٹک میزائل کا تجربہ کیا، جس کی رینج 450 کلومیٹر ہے۔یہ تجربہ بھی مشق "ایکس انڈس” کے دوران کیا گیا۔ ترجمان کے مطابق تجربے کا مقصد افواج کی تیاری اور میزائل کے جدید نیوی گیشنل نظام و بہتر حرکت کی صلاحیتوں کا جائزہ لینا تھا۔
پاک بحریہ کا بیلسٹک میزائل تجربہ
گزشتہ سال نومبر میں پاک بحریہ نے 350 کلومیٹر رینج والے مقامی بیلسٹک میزائل کا کامیاب تجربہ کیا۔آئی ایس پی آر کے مطابق یہ میزائل خشکی اور سمندر، دونوں اہداف کو انتہائی درستگی سے نشانہ بنانے کی صلاحیت رکھتا ہے اور جدید نیوی گیشنل ٹیکنالوجی سے لیس ہے۔
شاہین ٹو میزائل
گزشتہ سال اگست میں زمین سے زمین تک مار کرنے والے شاہین ٹو میزائل کا تجربہ کیا گیا۔آئی ایس پی آر کے مطابق اس تربیتی لانچ کا مقصد ٹروپس کی تربیت اور مختلف تکنیکی پہلوؤں کی جانچ تھا۔
راکٹ فورس کمانڈ کا قیام
پاکستان آرمی نے اگست میں "راکٹ فورس کمانڈ” قائم کی تاکہ دفاعی صلاحیتوں کو مزید مضبوط بنایا جا سکے۔یہ کمانڈ بیلسٹک، کروز اور ممکنہ طور پر ہائپر سونک میزائلوں کے آپریشن کی ذمہ دار ہوگی۔بھارت کے ساتھ حالیہ کشیدگی کے بعد پاکستان نے اپنی فوجی صلاحیتوں میں اضافہ کیا ہے اور مالی سال 2025-26 کے دفاعی بجٹ میں 20 فیصد اضافہ کیا گیا ہے۔
وزیراعظم شہباز شریف نے کہا کہ جدید ٹیکنالوجی سے لیس یہ فورس پاکستان کی روایتی جنگی صلاحیت کو مزید مستحکم کرنے میں اہم کردار ادا کرے گی۔
پاکستان کی جنوبی افریقہ کے خلاف پہلے ٹی20 میں ٹاس جیت کر فیلڈنگ
