پاکستانی حکومت نے حالیہ دنوں میں صحافیوں کے اسرائیل جانے کی رپورٹس کا نوٹس لے لیا ہے۔ ترجمان دفتر خارجہ شفقت علی خان نے اس حوالے سے میڈیا کے سوالات کا جواب دیا اور واضح کیا کہ حکومت ان رپورٹس کو سنجیدگی سے دیکھ رہی ہے۔
شفقت علی خان کا کہنا تھا کہ پاکستانی پاسپورٹس پر یہ واضح طور پر درج ہے کہ یہ "اسرائیل کے سفر کے لیے قابل استعمال نہیں” ہیں۔ موجودہ قوانین کے تحت پاکستانی پاسپورٹ پر اسرائیل کا سفر ممکن نہیں ہے، اور اس حوالے سے حکومت کی پوزیشن نہ صرف قانونی بلکہ اصولی بھی ہے۔ پاکستان کا اسرائیل کے بارے میں مؤقف تبدیل نہیں ہوا۔ انہوں نے تصدیق کی کہ پاکستان اسرائیل کو تسلیم نہیں کرتا اور فلسطینی عوام کے جائز حقوق کی غیر متزلزل حمایت جاری رکھے گا۔ انہوں نے اس بات کو بھی دوہرایا کہ پاکستان کی خارجہ پالیسی میں فلسطینی عوام کے حقوق کے لیے مکمل اور بھرپور حمایت شامل ہے، جس میں 1967 سے پہلے کی سرحدوں پر مبنی آزاد و خودمختار فلسطینی ریاست کا قیام اور اس کا دارالحکومت القدس الشریف ہو گا۔
شفقت علی خان نے یہ بھی کہا کہ پاکستان مسئلہ فلسطین کے منصفانہ حل کے لیے اپنی غیر متزلزل وابستگی کا اعادہ کرتا ہے، اور عالمی سطح پر فلسطینی عوام کے حقوق کے تحفظ کے لیے تمام تر کوششیں کرتا رہے گا۔
