چلڈرنز ہسپتال،یونیورسٹی آف چائلڈ ہیلتھ سائنسز لاہور نے ہیموفیلیا فاؤنڈیشن آف پاکستان کے تعاون سے پاکستان کے پہلے عوامی شعبے کے ہیموفیلیا ٹریٹمنٹ سینٹر کے قیام کا اعلان کیا ہے ۔
یہ معاہدہ جمعہ، 22 نومبر 2024 کو چلڈرنز ہسپتال لاہور میں منعقدہ ایک پروقار تقریب میں طے پایا۔ یہ اقدام ہیموفیلیا اور دیگر بلیڈنگ ڈس آرڈرز سے متاثرہ بچوں کے لیے معیاری تشخیص، علاج اور نگہداشت فراہم کرنے کے سلسلے میں ایک اہم سنگِ میل ہے۔ یونیورسٹی آف چائلڈ ہیلتھ سائنسز کے وائس چانسلر، پروفیسر ڈاکٹر مسعود صادق نے اس موقع پر کہا کہ پاکستان کے پہلے ہیموفیلیا ٹریٹمنٹ سینٹر کا قیام خون کے امراض میں مبتلا کمیونٹی کے لیے ایک انقلابی قدم ہے۔ یہ ان افراد کے لیے امید کی کرن ہے جو طویل عرصے سے مناسب علاج تک رسائی کے لیے جدوجہد کر رہے ہیں۔ یہ مرکز اس عزم کی عکاسی کرتا ہے کہ ہر مریض، چاہے اس کے علامات کچھ بھی ہوں، بہترین دیکھ بھال اور علاج حاصل کرے گا جس کا وہ مستحق ہے۔
ہیموفیلیا فاؤنڈیشن کے صدر، عباس علی زیدی نے اس تعاون کی اہمیت پر زور دیتے ہوئے کہا کہ یہ پاکستان کی ہیموفیلیا کمیونٹی کے لیے ایک تاریخی لمحہ ہے۔ دہائیوں سے خون کے امراض میں مبتلا افراد کو مناسب علاج اور دیکھ بھال تک رسائی میں بے پناہ چیلنجز کا سامنا رہا ہے۔ انہوں نے کہا کہ یہ ہسپتال اور ٹریٹمنٹ سینٹر امید کی ایک کرن اور روشن مستقبل کی علامت ہے۔ جب ہم ایک مشترکہ مقصد کے لیے مل کر کام کرتے ہیں، تو کوئی بھی کامیابی حاصل کرنا ممکن ہو جاتا ہے۔
پروفیسر ڈاکٹر سائمہ فرحان، ہیڈ آف ڈیپارٹمنٹ ہیماٹولوجی اور انتقال خون، یونیورسٹی آف چائلڈ ہیلتھ سائنسز، نے کہا کہ اس ٹریٹمنٹ سینٹر کا قیام خون کے امراض میں مبتلا بچوں کو درکار خصوصی دیکھ بھال اور علاج میں موجود ایک بڑی کمی کو پورا کرنے کے لیے ایک اہم قدم ہے۔ پاکستان میں بہت سے خاندان جو مالی مسائل اور سفر کی رکاوٹوں کی وجہ سے علاج تک رسائی حاصل نہیں کر پاتے ان کے لیے یہ ایک اہم سہولت ہے۔ ہم پبلک سیکٹر میں خصوصی اور جدید سہولیات متعارف کروا کر ہیموفیلیا سے متاثرہ بچوں کے بروقت، مؤثر اور قابل برداشت علاج کو یقینی بنا رہے ہیں۔ یہ سینٹر نہ صرف علاج فراہم کرے گا بلکہ ان بچوں کو ایک صحت مند، مفید اور بہتر زندگی گزارنے کا موقع بھی مہیا کرے گا۔
چلڈرنز ہسپتال/یونیورسٹی آف چائلڈ ہیلتھ سائنسز ، لاہور، ادارہ پاکستان کا سب سے بڑا اور جدید ترین بچوں کا طبی مرکز ہے، جو بچوں کو عام علاج سے لے کر خصوصی طبی سہولیات فراہم کرنے میں معروف ہے۔
ہیموفیلیا فاؤنڈیشن – پاکستان
ہیموفیلیا فاؤنڈیشن ایک غیر منافع بخش تنظیم ہے، جو موروثی بلیڈنگ ڈس آرڈرز سے متاثرہ افراد کی فلاح و بہبود اور علاج کی سہولتوں کو بہتر بنانے کے لیے وقف ہے۔
