لاہور(باغی ٹی وی)عید الفطر کی آمد کے ساتھ ہی پنجاب بھر کے بس اڈوں پر افراتفری کا عالم ہے۔ ہر سال کی طرح اس بار بھی ٹرانسپورٹ مافیا من مانے کرایوں کی وصولی میں مصروف ہے، جس سے اپنے آبائی علاقوں کو جانے والے مسافر شدید پریشانی کا شکار ہیں۔ لاہور سمیت مختلف شہروں سے عید منانے کے لیے اپنے گھروں کو لوٹنے والے شہریوں کو بس اڈوں پر لوٹا جا رہا ہے۔ ٹرانسپورٹرز کی جانب سے ایک ہی سیٹ کی متعدد ٹکٹیں جاری کی جا رہی ہیں، جس کی وجہ سے مسافروں کو شدید مشکلات کا سامنا ہے۔ کئی مسافروں نے بتایا کہ انہوں نے کل سے ٹکٹیں لے رکھی ہیں، لیکن انہیں گاڑی میں بیٹھنے کی جگہ نہیں مل رہی۔ اضافی کرایوں کے باوجود انہیں ذلیل کیا جا رہا ہے۔ مسافروں نے یہ بھی شکایت کی کہ بس اڈوں پر انتظامیہ یا پولیس کا کوئی اہلکار موجود نہیں ہے جو ٹرانسپورٹرز کے خلاف کارروائی کر سکے۔ خواتین اور بچوں کو بھی گاڑیوں کی کمی اور زیادہ بکنگ کی وجہ سے مشکلات کا سامنا ہے۔ ٹرانسپورٹرز اوور لوڈنگ کے ساتھ مسافروں کے سامان پر بھی اضافی چارجز وصول کر رہے ہیں۔
ٹرانسپورٹرز نے اضافی کرایوں کی وصولی کے الزامات کو مسترد کرتے ہوئے کہا ہے کہ مسافروں کی تعداد میں اضافے کی وجہ سے ٹرانسپورٹ کی قلت پیدا ہو گئی ہے۔ انہوں نے کہا کہ ایک ہی وقت میں بڑی تعداد میں لوگ اپنے علاقوں کو جا رہے ہیں، جس کی وجہ سے انہیں اضافی گاڑیاں چلانی پڑ رہی ہیں۔ ٹرانسپورٹرز کا کہنا ہے کہ راولپنڈی اور اسلام آباد سے جانے والے مسافروں کی تعداد بہت زیادہ ہے، لیکن واپسی پر گاڑیاں خالی آتی ہیں، جس کی وجہ سے انہیں بسوں، ڈرائیوروں اور عملے کے اخراجات پورے کرنے میں مشکل پیش آتی ہے۔ انہوں نے صرف 20 فیصد کرایوں میں اضافہ کیا ہے تاکہ وہ اپنے اضافی اخراجات پورے کر سکیں۔
دوسری جانب وزیراعلیٰ پنجاب مریم نواز شریف نے عید کے موقع پر مقررہ کرایوں سے زیادہ وصول کرنے پر سخت کارروائی کا حکم دیا ہے۔ انہوں نے زیادہ کرایہ وصول کرنے والے ٹرانسپورٹرز کے خلاف سخت قانونی کارروائی کی ہدایات جاری کی ہیں۔ انہوں نے بس اڈوں پر کرایہ نامے نمایاں طور پر آویزاں کرنے اور اضافی کرایوں کی وصولی کو روکنے کے لیے سخت نگرانی کرنے کی بھی ہدایات جاری کی ہیں۔
