پیمرا کی ٹی وی چینلز کو نئی ہدایات جاری، کرائم سین اور سی سی ٹی وی فوٹیج نشر کرنا ممنوع،پیمرا نے زیرِ حراست ملزمان کے انٹرویوز اور سامان کی نمائش پر پابندی عائد کر دی،سندھ پولیس کی درخواست پر پیمرا کا ایکشن: کرائم سینز کی فوٹیج نشر کرنے پر پابندی
میرپورخاص(باغی ٹی وی،نامہ نگارسیدشاہزیب شاہ ) پاکستان الیکٹرانک میڈیا ریگولیٹری اتھارٹی (پیمرا) نے ٹی وی چینلز پر کرائم سینز اور سی سی ٹی وی فوٹیج نشر کرنے پر پابندی عائد کر دی ہے۔ اس حوالے سے ایک نوٹیفکیشن بھی جاری کیا گیا ہے۔
نوٹیفکیشن کے مطابق اس پابندی کا اطلاق زیرِ حراست ملزمان کے انٹرویوز اور برآمد شدہ سامان کی نمائش پر بھی ہوگا، جسے اب ٹی وی چینلز پر دکھانا مکمل طور پر ممنوع ہے۔
یہ اہم قدم سندھ پولیس کی درخواست پر اٹھایا گیا ہے تاکہ میڈیا پر جرائم اور مجرموں کی غیر ضروری تشہیر کو روکا جا سکے۔
پیمرا نے تمام پروگرام منیجرز، نیوز ایڈیٹرز اور گرافک ڈیزائنرز کو ان ہدایات پر سختی سے عمل کرنے کی ہدایت دی ہے۔ اتھارٹی نے خبردار کیا ہے کہ اس اعلامیے کی خلاف ورزی کرنے والے چینلز کے خلاف پیمرا آرڈیننس کے تحت سخت قانونی کارروائی کی جائے گی۔
