پشاور(باغی ٹی وی) ریگی ماڈل ٹاؤن کے 32 سالہ پرانے تنازعے کے حل کے لیے کمشنر پشاور ڈویژن ریاض خان محسود نے متنازعہ زونز میں کوکی خیل قبیلے سے بات چیت کی۔ اس موقع پر ڈائریکٹر جنرل پشاور ڈویلپمنٹ اتھارٹی (پی ڈی اے) محمد نعیم، ضلعی انتظامیہ پشاور اور خیبر کے افسران بھی موجود تھے۔
وزیر اعلیٰ خیبر پختونخوا علی امین گنڈا پور کی ہدایات پر کمشنر پشاور نے ریگی ماڈل ٹاؤن کے دور افتادہ زون 1، زون 2 اور زون 5 کا دورہ کیا اور فریقین کا موقف سنا۔ ریاض محسود نے اس عزم کا اظہار کیا کہ گفت و شنید کے ذریعے اس تنازعے کا مستقل حل نکالا جائے گا۔ اس سلسلے میں آئندہ ہفتے مشترکہ اجلاس طلب کر لیا گیا ہے۔
