پشاور،تھانہ خزانہ کے حدود میں پولیس اہلکاروں کو رشوت وصول کرنے پر معطل کر دیا گیا

پشاور خزانہ پولیس موبائل کا چپس فیکٹری، سوئمنگ پول سمیت دیگر کاروباری مراکز سے بھتہ لینے کی ویڈیو سوشل میڈیا پر وائرل ہونے کے بعد دو پولیس اہلکاروں کو معطل کیا گیا ہے، تھانہ خزانہ کی حدود میں پولیس اہلکار مختلف علاقوں میں جاکر سر عام رشوت لینے لگے، وائرل ویڈیو میں شہری نے الزام لگایا کہ پولیس اہلکار کبھی کارخانے ،چھوٹی دکانوں تو کبھی سوئمنگ پول والوں سے رشوت لیتے ہیں جبکہ کبھی کہتے ہیں کہ گاڑی کی بیٹری خراب ہے اُس کو ٹھیک کروانے کے لیے پیسے دو، رشوت لینے کی ویڈیو میں پولیس اہلکاروں کو چپس فیکٹری مالک سے پیسوں کا مطالبہ کرتے دکھایا گیاہے۔ جبکہ چپس کے پیکٹ وصول کر کے اسے مزے سے کھاتا ہوا بھی دکھائی دے رہا ہے، ویڈیو وائرل ہونے کے بعد ایس پی رورل نے فوری نوٹس لیتے ہوئے دو اہلکاروں کو معطل کر کے ان کیخلاف محکمانہ کارروائی شروع کر دی۔