اسلام آباد: وزیرِ اعظم پاکستان نے پیٹرولیم مصنوعات کی قیمتیں موجودہ سطح پر برقرار رکھنے کا فیصلہ کیا ہے،ساتھ ہی بجلی کے نرخوں میں کمی کے بارے بھی جلد اعلان کرنے کا عندیہ دیا ہے
وزیرِ اعظم شہباز شریف نے کہا کہ یہ اقدام ایک بڑے اقتصادی ریلیف پیکج کا حصہ ہے، جس کے تحت بجلی کے نرخوں میں بامعنی کمی کی جائے گی۔ انہوں نے اس بات پر زور دیا کہ بجلی کی قیمتوں میں کمی کے حوالے سے ایک جامع اور مؤثر حکمت عملی تیار کی جا رہی ہے، جس کی تفصیلات کو حتمی شکل دی جا رہی ہے۔وزیرِ اعظم نے عالمی منڈی میں تیل کی قیمتوں میں ردوبدل سے حاصل ہونے والی مالی گنجائش کا ذکر کرتے ہوئے کہا کہ حکومت نے اس کا فائدہ عوام تک پہنچانے کے لیے ایک بڑا ریلیف پیکج تیار کیا ہے، جس کے تحت بجلی کی قیمتوں میں کمی کی جائے گی۔ انہوں نے یہ بھی کہا کہ بجلی کے نرخوں میں کمی کے حوالے سے اس پیکج کا اعلان آئندہ چند ہفتوں میں کیا جائے گا۔
وزیرِ اعظم نے اپنی حکومت کی اولین ترجیح عوامی ریلیف کو قرار دیتے ہوئے کہا کہ جب سے حکومت سنبھالی ہے، ان کا مقصد عوام کو اقتصادی سہولتیں فراہم کرنا ہے۔ انہوں نے مزید کہا کہ بجلی کے نرخوں میں کمی کے اس پیکج سے نہ صرف بجلی کی قیمتوں میں کمی آئے گی، بلکہ اس کا اثر مجموعی طور پر مہنگائی پر بھی پڑے گا اور اس میں مزید کمی واقع ہوگی۔وزیرِ اعظم نے اس بات کا عزم ظاہر کیا کہ وہ بہت جلد اس ریلیف کے حوالے سے قوم کو خود آگاہ کریں گے، تاکہ عوام کو ان کی حکومت کی طرف سے ملنے والی سہولتوں کا فائدہ پہنچ سکے۔
