: خلیج فارس میں بڑھتی ہوئی کشیدگی اور ممکنہ جنگی صورتحال کے باعث پاکستان انٹرنیشنل ایئرلائنز (پی آئی اے) نے اپنے فضائی آپریشن میں حفاظتی اقدام کے طور پر اہم تبدیلیاں کی ہیں۔ پی آئی اے نے پاکستان سے قطر، بحرین، کویت اور دبئی کے لیے اپنی تمام پروازوں کو وقتی طور پر منسوخ کر دیا ہے۔
ذرائع کے مطابق، پی آئی اے کی انتظامیہ نے خلیجی ممالک میں جاری کشیدگی کی روشنی میں اپنے مسافروں اور عملے کی حفاظت کو اولین ترجیح دیتے ہوئے یہ فیصلہ کیا ہے کہ ان ممالک کے لیے پروازیں فی الحال محدود رکھی جائیں گی۔پی آئی اے کے ترجمان نے ایک بیان میں کہا کہ "خلیج فارس میں غیر مستحکم صورتحال اور ممکنہ تنازعہ کی وجہ سے پاکستان اور خلیج کے درمیان فضائی رابطے کو محفوظ بنانے کے لیے حفاظتی اقدامات کیے جا رہے ہیں۔” انہوں نے مزید کہا کہ "ہم مسافروں کو بروقت آگاہ کرتے رہیں گے اور صورتحال میں بہتری کے بعد پروازوں کی بحالی کا اعلان کریں گے۔”
ماہرین کا کہنا ہے کہ خلیج فارس میں فوجی سرگرمیوں میں اضافہ اور خطے میں کشیدگی کی وجہ سے فضائی راستوں میں ممکنہ خطرات پیدا ہو سکتے ہیں، جس کے پیش نظر پاکستان سمیت متعدد ممالک نے اپنی فضائی سرگرمیاں محدود کی ہیں۔مسافروں کے لیے پی آئی اے نے ہیلپ لائنز اور کسٹمر سروس کو فعال کر رکھا ہے تاکہ وہ اپنی بکنگ اور سفر کے متعلق معلومات حاصل کر سکیں۔
