پاکستان کی قومی ائیرلائن پی آئی اے نے خلیج کے لیے پروازیں بحال کر دی ہیں
کراچی،لاہور اور اسلام آباد سمیت مختلف ائیرپورٹ سے 55 پروازوں کی روانگی میں تاخیر ہوئی ہے،کراچی سے جدہ، دوحہ اوراستنبول کے لیے 8 پروازیں منسوخ کی گئیں، اس کے علاوہ کراچی سے دبئی کے لیے غیر ملکی ائیرلائن کی 2 پروازیں منسوخ ہوئیں جب کہ لاہور سے شارجہ، مسقط اورریاض کے لیے 5 پروازیں منسوخ ہوئیں، شارجہ سے پشاور، دبئی اورابوظبی کےلیے 5 پروازیں منسوخ ہوئیں، قومی ائیرلائن کی لاہور سے مدینہ کی پرواز 13 گھنٹے تاخیرکاشکار ہوئی جب کہ لاہور سے دمام کی پروازب بھی تاخیرکا شکار ہے،اسلام آباد سے دبئی کے لیے قومی ائیرلائن کی پرواز15 گھنٹے تاخیر کاشکار ہوئی، بحرین سے اسلام آباد کی 2 پروازوں میں 4 گھنٹے سے زائدکی تاخیر ہوئی۔
تہران پر امریکی حملے کے جواب میں ایران کی جانب سے قطر میں واقع امریکی فضائی اڈے پر میزائل حملوں کے بعد مشرق وسطیٰ میں فضائی سفر مزید متاثر ہو گیا ہے۔ خطے میں کشیدگی کے پیش نظر کئی ممالک نے اپنی فضائی حدود عارضی طور پر بند کر دی تھی، جس کے باعث متعدد ایئر لائنز کو پروازیں منسوخ، موخر یا متبادل راستوں پر منتقل کرنا پڑا۔مشرق وسطیٰ سے گزرنے والے مسافروں کو ہدایت کی گئی ہے کہ وہ روانگی سے قبل اپنی ایئر لائنز سے تازہ ترین صورت حال معلوم کریں۔
قطر ایئر ویز نے اپنے بیان میں کہا ہے کہ حمد انٹرنیشنل ایئرپورٹ سے پروازوں کا سلسلہ دوبارہ شروع کر دیا گیا ہے اور قطری فضائی حدود بھی بحال کر دی گئی ہے۔دبئی ایئرپورٹس نے بھی مکمل آپریشن بحال کر دیا،متحدہ عرب امارات میں دبئی ایئرپورٹس کے حکام نے تصدیق کی ہے کہ دبئی کے ہوائی اڈوں پر "عارضی حفاظتی وقفے” کے بعد فل فلائٹ آپریشن دوبارہ شروع کر دیا گیا ہے۔
ایئر انڈیا نے مشرق وسطیٰ کے لیے تمام پروازیں معطل کر دیں،ایئر انڈیا نے اعلان کیا ہے کہ موجودہ کشیدہ حالات کے باعث مشرق وسطیٰ کے لیے تمام پروازیں فوری طور پر بند کر دی گئی ہیں۔ اس کے ساتھ ہی شمالی امریکا اور یورپ کے مشرقی ساحلی شہروں سے آنے اور جانے والی پروازیں بھی اگلے اعلان تک معطل رہیں گی۔
سنگاپور ایئرلائنز نے 24 اور 25 جون کو سنگاپور سے دبئی جانے والی پروازیں منسوخ کر دی ہیں۔ آسٹریلیا کی قومی ایئرلائن قنطاس نے تصدیق کی ہے کہ آسٹریلیا اور یورپ کے درمیان 24 جون کو روانہ ہونے والی پروازیں حسبِ معمول روانہ ہو رہی ہیں۔
