حافظ آباد،باغی ٹی وی (خبر نگار)پنڈی بھٹیاں میں یوم یکجہتی کشمیر کے موقع پر بھرپور احتجاجی ریلی، کشمیری عوام سے اظہارِ یکجہتی
تفصیل کے مطابق پاکستان بھر کی طرح پنڈی بھٹیاں میں بھی یوم یکجہتی کشمیر جوش و جذبے سے منایا گیا، جہاں ایک بڑی احتجاجی ریلی نکالی گئی۔ اس ریلی میں اسسٹنٹ کمشنر، ڈی ایس پی پنڈی بھٹیاں، مقامی ایم پی اے، سرکاری افسران، طلبہ، اساتذہ، اور سول سوسائٹی کے نمائندوں نے شرکت کی۔
ریلی کا آغاز صبح ضلع کونسل آفس سے ہوا، جہاں شرکاء نے پاکستانی اور کشمیری پرچم تھامے بھارت کے غاصبانہ قبضے اور کشمیری عوام پر ہونے والے مظالم کے خلاف شدید نعرے بازی کی۔ ریلی کے دوران "کشمیر بنے گا پاکستان”، "بھارت کا بھیانک چہرہ بے نقاب کرو”، اور "ہم لے کے رہیں گے آزادی” جیسے فلک شگاف نعرے بلند کیے گئے۔
ریلی میں شریک افراد نے ہاتھوں میں بینرز اور پلے کارڈز اٹھا رکھے تھے، جن پر بھارتی ظلم و ستم کے خلاف مذمتی نعرے درج تھے۔ شرکاء نے بھارتی مظالم کی مذمت کرتے ہوئے عالمی برادری سے مطالبہ کیا کہ وہ کشمیر میں انسانی حقوق کی سنگین خلاف ورزیوں کا نوٹس لے اور کشمیری عوام کو ان کا جائز حقِ خودارادیت دلانے میں کردار ادا کرے۔
ریلی سے خطاب کرتے ہوئے اسسٹنٹ کمشنر پنڈی بھٹیاں نے کہا کہ پاکستان ہمیشہ کشمیری عوام کے شانہ بشانہ کھڑا رہے گا اور ہر فورم پر ان کی حمایت جاری رکھی جائے گی۔ انہوں نے مزید کہا کہ کشمیر پاکستان کی شہ رگ ہے اور کشمیری عوام کی قربانیاں رائیگاں نہیں جائیں گی۔
ڈی ایس پی پنڈی بھٹیاں نے خطاب کرتے ہوئے کہا کہ بھارتی حکومت نے ظلم و جبر کی انتہا کر دی ہے، لیکن کشمیری عوام کی جدوجہد آزادی اب رکنے والی نہیں۔ انہوں نے عالمی برادری سے مطالبہ کیا کہ وہ بھارت پر دباؤ ڈالے تاکہ کشمیری عوام کو اقوام متحدہ کی قراردادوں کے مطابق ان کا حق دیا جائے۔
مقامی ایم پی اے نے کہا کہ آج پوری پاکستانی قوم کشمیری بھائیوں کے ساتھ یکجہتی کا مظاہرہ کر رہی ہے اور ان کے حق میں آواز بلند کر رہی ہے۔ انہوں نے کہا کہ بھارت اپنی سازشوں اور ریاستی جبر کے باوجود کشمیری عوام کے حوصلے پست نہیں کر سکا، اور وہ دن دور نہیں جب کشمیر پر آزادی کا سورج طلوع ہوگا۔
ریلی مختلف راستوں سے ہوتی ہوئی مین چوک پر اختتام پذیر ہوئی، جہاں ایک منٹ کی خاموشی اختیار کر کے کشمیری شہداء کو خراجِ عقیدت پیش کیا گیا۔ اس موقع پر قومی اور کشمیری ترانہ بھی بجایا گیا، جس سے فضا پاکستان اور کشمیر زندہ باد کے نعروں سے گونج اٹھی۔
ریلی کے اختتام پر کشمیری عوام کے لیے خصوصی دعائیں کی گئیں اور اس عزم کا اظہار کیا گیا کہ پاکستان کی عوام ہر سطح پر اپنے کشمیری بھائیوں کی اخلاقی، سفارتی، اور سیاسی حمایت جاری رکھے گی، یہاں تک کہ مقبوضہ کشمیر آزاد ہو کر پاکستان کا حصہ بن جائے۔
