پلازمہ پر کمیشن مانگنے والا اللہ کی رحمت پر دلالی کرتا ہے ، ڈاکٹر وقاص نواز

پلازمہ پر کمیشن مانگنے والا اللہ کی رحمت پر دلالی کرتا ہے ، ڈاکٹر وقاص نواز

ایک مریض کو جب منع کیا کہ کرونا سے ٹھیک ہونے کے بعد پلازما کیلئے کسی کی مجبوری کا فائدہ اٹھا کر پانچ پانچ لاکھ کی تجارت نہ کرے تو اس نے ” یہاں یہی دستور ہے ” کہہ کر بات سنی ان سنی کردی – پلازما دینے سے پہلے لازمی ہوتا ہے کہ ہیپاٹائٹس بی سی چیک کرایا جایے- سو جب اس نے ٹیسٹ کرایا تو ہیپاٹائٹس بی مثبت آیا – ایسا ہو تو اگلا قدم پیٹ کا الٹرا ساونڈ ہوتا ہے – جب وہ کروایا تو اس میں جگر کا سرطان (کینسر) بیٹھا انسان کی اس حسابی فطرت کا مذاق اڑا رہا تھا جس کا علاج کسی پلازمہ سے بھی ممکن نہی تھا ……..!

الله کی رحمت سے کرونا سے ٹھیک ہونے والے لوگ جب اپنے پلازمہ پر وینٹیلیٹر پر پڑے مریضوں سے پانچ لاکھ مانگتے ہیں تو وہ کاروبار نہیں کرتے بلکہ الله کی رحمت پر کمیشن مانگ کراس کی خدائی پردلالی کرتے ہیں- یاد رکھیے ! کوئلوں کی دلالی میں بس منہ کالا ہوتا ہے لیکن اس دلالی میں روح کالی سیاہ اور دل جگر گل سڑ جاتے ہیں جس کی باس میں انسانیت کا دم گھٹتا ہے – خون میں شفا پیدا ہوئی ہے تو اس میں اس باس کی ملاوٹ نہ کیجیے – ایسا نہ ہو کہ اس کا تعفن آپ کے اپنوں کے پھیپھڑوں کا سرطان بن جایے جس کا علاج کسی پلازما سے بھی ممکن نہ ہو – کیوں کہ جس ذات نے اس خون میں شفا دی ہے وہ اس بات پر بھی قادر مطلق تھی کہ آپ آج "بروکر”کی کرسی پر نہیں بلکہ "وینٹیلیٹر” پر پڑے ہوتے اور آپ کے گھر والے اسی پلازمہ کیلئے جگہ جگہ رل رہے ہوتے –

#قلم کی جسارت وقاص نواز 399