وزیرِ اعظم شہباز شریف کل (پیر) مصر کے شہر شرم الشیخ میں ہونے والے امن سربراہی اجلاس میں شرکت کے لیے روانہ ہوں گے، جہاں امریکی صدر ڈونلڈ ٹرمپ کے غزہ امن معاہدے پر دستخط ہوں گے۔
اجلاس میں برطانیہ، فرانس، جرمنی کے سربراہانِ مملکت اور اقوامِ متحدہ کے سیکریٹری جنرل سمیت متعدد عالمی رہنما شریک ہوں گے۔ ترجمان دفترِ خارجہ کے مطابق وزیرِ اعظم کو اجلاس میں شرکت کی دعوت مصر اور امریکا کے صدور نے دی تھی۔ نائب وزیرِ اعظم اسحاق ڈار سمیت دیگر سینئر وزراء بھی وزیرِ اعظم کے ہمراہ ہوں گے۔ ترجمان نے بتایا کہ شرم الشیخ امن سربراہی اجلاس کا مقصد غزہ کی سنگین صورتِ حال کے خاتمے کے لیے امن معاہدے پر دستخط کرنا ہے۔ یہ اجلاس اقوامِ متحدہ کی جنرل اسمبلی کے 80 ویں اجلاس کے دوران شروع ہونے والی سفارتی کوششوں کا تسلسل ہے۔
یاد رہے کہ وزیرِ اعظم نے 23 ستمبر کو نیویارک میں 7 عرب و اسلامی ممالک کے رہنماؤں کے ساتھ امریکی صدر سے ملاقات میں امن اقدامات پر گفتگو کی تھی، جس میں صدر ٹرمپ کی کوششوں کو سراہا گیا اور غزہ میں دیرپا جنگ بندی کے عزم کا اعادہ کیا گیا۔
ترجمان دفترِ خارجہ کے مطابق وزیرِ اعظم کی شرکت فلسطینیوں کے حقِ خود ارادیت اور منصفانہ مؤقف کی حمایت کی علامت ہے۔ امید ہے کہ شرم الشیخ اجلاس اسرائیلی انخلاء، فلسطینیوں کے تحفظ اور غزہ کی تعمیرِ نو کی راہ ہموار کرے گا۔ دفترِ خارجہ نے واضح کیا کہ پاکستان دو ریاستی حل پر مبنی آزاد فلسطینی ریاست کے قیام کی بھرپور حمایت کرتا ہے۔
بنوں میں فتنہ الخوارج کا حملہ، حوالدار شہید، ایک جوان زخمی
بنوں میں فتنہ الخوارج کا حملہ، حوالدار شہید، ایک جوان زخمی
